काठमाडौ, आउँदो शुक्रबारदेखि दक्षिण अफ्रिकामा सुरु हुन लागेको आइसिसी यू–१९ विश्वकपअन्तर्गत नेपाल र वेस्ट इण्डिजबीचको वार्मअप खेल रद्द भएको छ ।
मंगलबार दिउँसो जोहान्सबर्गस्थित सेन्ट स्थिथिनास मेन ओभलमा भएको खेल वर्षाका कारण रद्द भएको हो ।
हारेर ब्याटिङको निम्तो पाएको वेस्ट इन्डिजले ८।३ ओभरमा एक विकेट गुमाएर ३३ रन जोडेको अवस्थमा पानी परेको थियो । त्यसपछि पानी नरोकिएपछि खेल रद्द हुन पुगेको हो ।
वेस्ट इण्डिजविरुद्ध गुलशन झाले एक विकेट लिएका थिए । उनले वेस्ट इन्डिजका ओपनर एड्रन वेयरलाई आकाश चन्दको हातबाट क्याचआउट गराएका थिए ।
पहिलो वार्मअप खेलमा नेपालले डकवर्थ लुईस पद्धतिअनुसार नेपालले स्कटल्याण्डलाई ७ विकेटले हराएको थियो ।
त्यसअघि नेपालले अनौपचारिक अभ्यास खेलमा स्कटल्याण्डसहित नामिबियालाई हराएको थियो ।
विश्वकपमा समूह ‘डी’ मा रहेको नेपालले पहिलो खेल आइतबार न्यूजील्याण्डविरुद्ध खेल्ने तालिका छ ।
त्यसपछि नेपालले बुधबार पाकिस्तान तथा शुक्रबार अफगानिस्तानसँग खेल्नेछ ।
