काठमाडौं, प्रधानमन्त्री पुष्पकमल दाहाल असंलग्न आन्दोलन (नाम) को शिखर सम्मेलनमा सहभागी हुन युगान्डा प्रस्थान गरेका छन् ।
नेपाली प्रतिनिधिमण्डलको नेतृत्व गर्दै दाहाल नेतृत्वको टोली आज बिहान २ बजे कतार एअरलाइन्समार्फत् कम्पाला उडेका हुन् ।
१९औँ सम्मेलन भोलिदेखि युगान्डाको राजधानी कम्पालामा हुँदैछ । प्रधानमन्त्री नेतृत्वको प्रतिनिधिमण्डलमा प्रधानमन्त्री पुत्री गङ्गा दाहाल, परराष्ट्र सचिव सेवा लम्साल, नेपाल सरकारका वरिष्ठ अधिकारीहरू सहभागी छन् ।
सम्मेलनको पहिलो दिन प्रधानमन्त्री दाहालले ‘साझा विश्व समृद्धिका लागि गहन सहकार्य’ विषयमा शिखर सम्मेलनमा सम्बोधन गर्ने छन् ।
सोही दिन प्रधानमन्त्री दाहाल गणतन्त्र युगान्डाका राष्ट्रपति जनरल योवेरी कागुटा मुसेभेनीले प्रतिनिधिमण्डलका प्रमुखहरूको सम्मानमा आयोजना गर्ने राजकीय भोजमा सहभागी हुनेछन् ।
शिखर सम्मेलनकै क्रममा प्रधानमन्त्री दाहालले सहभागी राष्ट्र प्रमुख, सरकार प्रमुख र अन्य उच्च पदस्थ व्यक्तित्वसँग द्विपक्षीय भेटवार्ता गर्ने कार्यक्रम छ ।
यसअघि मन्त्रीस्तरीय बैठकमा सहभागी हुन परराष्ट्रमन्त्री नारायणप्रकाश साउद माघ १ गते त्यसतर्फ प्रस्थान गरिसकेका छन् ।
नेपाल असंलग्न आन्दोलनको संस्थापक सदस्य हो र यसको स्थापनादेखि नै सबै शिखर सम्मेलनमा सहभागी हुँदै आएको छ । प्रधानमन्त्री दाहाल माघ ७ गते स्वदेश फर्कने छन् ।
