काठमाडौं, बिहे हुनु ठिक महिना दिन अघि बक्सिङ खेलाडी मृत भेटिएकी छिन् । मंगलबार साँझ ८ बजे भक्तपुरस्थित आफ्नै तीन तले घरको छतमा निता गोसाईं प्राण गइसकेको अवस्थामा भेटिइन् ।
निता ६ वर्षअघि सशस्त्र प्रहरीमा भर्ना भएकी थिइन् । २७ वर्षीया गोसाईं सशस्त्र प्रहरी बल( एपीएफ) क्लबबाट घरेलु प्रतियोगिताहरू खेल्दै आएकी थिइन् ।
उनी नवौँ राष्ट्रिय खेलकुदमा उनी ५४ केजी तौल समूहमा रजत पदक जित्न सफल भएकी थिइन् । निताको करियरको सबैभन्दा ठूलो उपलब्धि त्यही नै थियो ।
अन्तर्राष्ट्रिय प्रतियोगिता भने खेल्न बाँकी थियो । मृत भेटिँदा उनी जस्ताको डन्डीमा पासो लागेको अवस्थामा भेटिएकी प्रहरीले जनाएको छ।
पारिवारिक स्रोतका अनुसार गोसाईंको आगामी फागुन २ गते विवाह हुँदै थियो । निताको मृत्युपछि भक्तपुर प्रहरीले प्रारम्भिक अनुसन्धानमा आत्महत्या देखिएको जनाएको छ ।
पूर्व प्रेमीले दिएको तनावको कारण उनले आत्महत्या गरेको हुनसक्ने प्रारम्भिक अनुसन्धानबाट खुलेको छ । निताको परिवारले ती युवकविरुद्ध आत्महत्या दुरुत्साहनको जाहेरी पनि दिएका छन् ।
ती युवक पक्राउ पनि परेका छन् । कतिपयले ती युवक निताको साथी मात्र भएको बताएका छन्। कतिपयले दुईबीच विगतमा प्रेम सम्बन्ध रहेको बताएका छन् ।
विगतको सम्बन्धका विषयमा युवकले नितालाई यातना दिने गरेको जाहेरीमा दाबी गरिएको छ ।
