बाँकेस्थित क्षेत्रीय कारागारबाट भागे बन्दी, प्रहरीले कारबाही गर्दा ५ जनाको मृत्यु

नेपालगञ्ज, बाँकेको नौबस्तामा रहेको क्षेत्रीय कारागार तथा बाल सुधार गृहबाट कैदी बन्दी भागेका छन् ।

कारागारमा रहेका ५ सय ८५ मध्ये १ सय ४९ जना, त्यही रहेको बालसुधार गृहमा रहेका १ सय ७६ मध्ये ७६ जना भागेको बुझिएको छ ।

कारागार र बालसुधार गृहमा खटिएको सशस्त्र प्रहरीले कारबाही गर्दा ५ जनाको मृत्यु भएको सुरक्षास्रोतले बताएको छ ।

प्रहरीको कारबाहीमा ७ जना घाइते भएको, उनीहरुलाई भेरी अस्पतालमा उपचारका लागि ल्याएको र त्यसमा ५ जनाको मृत्यु भएको छ ।

यस्तै, सरकारी कार्यालयहरुमा लुटपाट भएको छ । दिउँसो तोडफोड र आगजनी गरिएका कार्यालयमा राती चोरी भएको छ ।

नेपालगञ्जको मालपोत, राजश्व, जिल्ला अदालत, उच्च अदालत, नेपालगन्ज उपमहानगरपालिका, कोहलपुरको राजश्व कार्यालयमा लुटपाट भएको छ ।

सुरक्षा निकायले हात उठाइदिँदा रातीमा लुटपाट भएको हो । यसैगरी, बजारमा अहिले नेपाली सेना खटिएको छ ।