नेपालगन्ज, बाँकेको दुईवटा बालसुधार गृह र एउटा कारागारबाट भागेका ३ सय ४२ जना बालबन्दी र कैदीहरुमध्ये हालसम्म ४७ जना पक्राउ परेका छन् ।
२ सय ९५ जना अझै पनि फरार रहेकाले खोजी कार्य भइरहेको प्रहरीले जनाएको छ ।
जिल्लाको बैजनाथ गाउँपालिकास्थित नौबस्ता बाल सुधारगृह र डुडुवाको जयन्दु बालसुधार गृहबाट भागेका १ सय ९५ जना बालबन्दीमध्ये ३४ जना पक्राउ परेको तथा नौबस्ता क्षेत्रीय कारागारबाट भागेका १ सय ४७ जना कैदीमध्ये १३ जना पक्राउ परेको बालसुधार गृह र कारागारका अधिकारीहरुले जनाएका छन् ।
डुडुवास्थित जयन्दु बालसुधार गहृका प्रमुख किशोर शर्माले जेनजी आन्दोलनको बेला सुधारगृहमा रहेका २२८ जना बालबन्दीमध्ये १ सय १५ जना भागेकोमा २१ जना पक्राउ परेको र ९४ जनाको खोजी भइरहेको बताए ।
पmरार रहेकालाई बालसुधार गृहमा फर्किन अनुरोध गरिएको प्रमुख शर्माले बताए ।
सोही प्रकारले नौबस्ता बाल सुधारगृहका प्रमुख श्यामबहादुर रानाले सुधारगृहमा रहेका १ सय ७२ जना बालबन्दीमध्ये ८० जना भागेकोमा १३ जना पक्राउ परेको बताए ।
पाँच जना बाँकेबाट र आठ जना दाङबाट पक्राउ परेको रानाले बताए । सो सुधारगृहका ६५ जना बालबन्दीको खोजीकार्य भइरहेको छ ।
यसैगरी नौबस्ताकै क्षेत्रीय कारागारबाट फरार भएका १ सय ४७ जना कैदीमध्ये १३ जना पक्राउ परेको तथा १ सुय ३४ जनाको खोजी भइरहेको क्षेत्रीय कारागारका प्रमुख जालन्धर भुषालले बताए ।
सो कारागारमा ५ सय ८५ जना कैदीहरु थिए ।
पक्राउ परेका ४७ जनामध्ये केही आफै फर्किएको र अधिकांशलाई खोज तलाशका क्रममा पक्राउ गरिएको जिल्ला प्रहरी कार्यालय बाँकेले जनाएको छ ।
अझै पनि फरार रहेको २ सय ९५ जना बालबन्दी र कैदीलाई फर्किन अनुरोध गरिएको जनाउँदै नफर्किए खोजतलाश गरी पक्राउ गरिने चेतावनी दिइएको छ ।
जिल्लाको विभिन्न बालसुधार गृह र कारागारबाट कैदीबन्दी भागेपछि अहिले ती सबै ठाउँमा नेपाली सेनाले सुरक्षा प्रदान गरिरहेको छ ।
जेनजी आन्दोलनको समयमा देशभरिका विभिन्न बाल सुधारगृह र कारागारबाट कैदी बन्दीहरु भागेका थिए ।
