चितवन, मुग्लिन नौविसे सडकखण्डअन्तर्गत धादिङको बेनीघाट नजिकै बाँदरेमोडमा पहिरो खसेर अवरुद्ध भएको सडक सञ्चालनमा आएको छ ।
बुधबार राति ९ बजे पहिरो खसेर दुईतर्फी नै सडक बन्द रहेकोमा रातभर काम गरेपछि बिहानबाट यातायात सञ्चालनमा आएको हो ।
अहिले दुईतर्फी नै गाडी सञ्चालन भएको मुग्लिन नागढुङ्गा सडक योजना कार्यालय पश्मिच खण्डका प्रमुख केदार नेपालले जानकारी दिए ।
यस सडकखण्डमा खसेको पहिरो पन्छाए पनि फेरि पहिरो झर्ने जोखिम भने कायम रहेको उनले जानकारी दिए ।
मुग्लिन–नारायणगढ सडकखण्डअन्तर्गत तुइनखोलामा मङ्गलबारदेखि बन्द भएको सडक अझै खुलेको छैन ।
बुधबारदेखि नै पहिरो पन्छाउने काम भए पनि ठूलो पहिरो खसेका कारण काम गर्न कठिन भएको जिल्ला प्रहरी कार्यालय चितवनका प्रमुख गोविन्द पुरीले जानकारी दिए ।
तुइनखोलाको पहिरो बिहानैदेखि पन्छाउने काम भइरहेको छ । मुग्लिन नारायणगढ सडकखण्डमा आएको पहिरोका कारण मुग्लिनमा रोकिएका सवारी साधनले पोखरा काठमाडौँका यात्रा कठिन भएको छ ।
सवारी साधनको जामले गर्दा पोरखा जान समस्या भएको छ । ट्राफिक नियम विपरीत सवारी साधन रोकिँदिदा सडकनै अवरुद्ध भएको छ ।
मुग्लिन प्रहरीले रोकिएका सवारी साधनलाई व्यवस्थित पारेर पोखरा, काठमाडौँ यातायात सहज सञ्चालन गराउन प्रयास गरिराखेको छ ।
