चितवन, अविरल वर्षापछि अवरुद्ध बनेको नारायणगढ-मुग्लिन सडक र पृथ्वी राजमार्गमा आज बिहानदेखि पुनः यातायात सञ्चालन भएको छ।
जिल्ला प्रहरी कार्यालय चितवनका अनुसार बिहान ६ बजेदेखि यातायात सेवा पूर्ववत् रूपमा सञ्चालनमा आएको हो।
गतशुक्रबार र शनिबार परेको लगातार वर्षाका कारण पहिरो खस्ने उच्च जोखिम देखिएकाले आइतबार राति ९ बजेपछि सार्वजनिक तथा निजी सवारीसाधनको आवागमन रोकिएको थियो।
प्रहरी उपरीक्षक गोविन्द पुरीका अनुसार सडक सञ्चालनमा आएसँगै रोकिएका सवारी गन्तव्यतर्फ लागेका छन्।
जिल्लाभरका १४ वटा होल्डिङ सेन्टरमा रोकिएका लामो तथा छोटो दूरीका सवारीसाधनहरू पनि बिहानदेखि गन्तव्यतर्फ जान थालेका छन्।
