काठमाडौं, प्रमुख प्रतिपक्षी दल नेपाली कांग्रेसको संसदीय दलको बैठक आज बस्दैछ । कांग्रेसले बिहीबार नै दलको बैठक राखेको थियो ।
तर, नेता सूर्यमान गुरुङको निधनका कारण अन्तिम समयमा बैठक स्थगित भएको थियो ।
बिहान साढे ८ बजेदेखि संसदीय दलको बैठक बस्ने प्रमुख सचेतक रमेश लेखकले जानकारी दिए ।
नयाँ बानेश्वरस्थित संघीय संसद् भवनको ल्होत्से हलमा बस्ने बैठकमा संघीय संसद्को बजेट अधिवेशनको तयारीका विषयमा छलफल हुने कांग्रेसले जनाएको छ ।
सहकारी ठगी प्रकरणमा गृहमन्त्री रवि लामिछानेमाथि नै आरोप लागेपछि कांग्रेसले संसदीय समिति गठन गरी छानबिन गर्नुपर्ने माग गर्दै आएको छ ।
यो अधिवेशनमा समेत सरकारले छानबिन समिति गठन नगरे संसद् पूर्णरूपमा ठप्प पार्ने कांग्रेसको चेतावनी छ ।
बुधबार बसेको पार्टीका शीर्ष नेताहरूको बैठकले सहकारी ठगी प्रकरणमा थप कडारूपमा प्रस्तुत हुने रणनीति बनाएको थियो ।
शुक्रबारको बैठकले त्यसबारे निर्णय लिने प्रमुख सचेतक लेखकले बताए ।
