एजेन्सी, कोलकाता नाइट राइडर्स भारतमा जारी १७औँ संस्करणको इण्डियन प्रिमियर लिग ( आइपीएल ) को प्लेअफ प्रवेश गरेको छ ।
गएराति सम्पन्न खेलमा मुम्बई इण्डियन्सलाई १८ रनले हराउँदै कोलकाता प्लेअफमा प्रवेश गरेको हो ।
योसँगै ऊ जारी संस्करणमा औपचारिकरूपमा प्लेअफमा स्थान बनाउने पहिलो टिम बन्यो । मुम्बई भने यसअघि नै प्लेअफ दौडबाट बाहिरिएको थियो ।
आफ्नो १३औँ खेलमा कोलकाताले दिएको १ सय ५८ रनको लक्ष्य पछ्याएको मुम्बईले वर्षाका कारण १६ ओभरमा झारिएको खेलमा ८ विकेट गुमाएर १ सय ३९ रन मात्र बनाउन सक्यो ।
उसका लागि इशान किसनले ४०, तिलक वर्माले ३२, रोहित शर्माले १९, नमन धीरले १७ र सूर्यकुमार यादवले ११ रन जोडे ।
कोलकाताका लागि आन्द्रे रसेल, वरुण चक्रवर्ती र हर्षित रानाले दुई/दुई तथा सुनिल नारायणले एक विकेट लिए ।
त्यसअघि इडेन गार्डेनमा टस हारेर ब्याटिङको मौका पाएको कोलकाताले १६ ओभरमा ७ विकेट गुमाएर १ सय ५७ रन बनायो ।
उसका लागि वैंकटेश अय्यरले ४२, नितिश रानाले ३३, आन्द्रे रसेलले २४, रिंकु सिंहले २० र रमनदीप सिंहले अविजित १७ रन बनाए ।
मुम्बईका लागि जसप्रित बुहरा र पियुष चावलाले दुई/दुई तथा नुवा तुषारा र अंशुल कम्बोजले एकरएक विकेट लिए ।
यो जितपछि शीर्ष स्थानमा रहेको कोलकाताले १२ खेलबाट १८ अंक जोडेको छ । उसले जारी सिजनमा ९ मा जित र ३ खेलमा मात्र हार बेहोरेको छ ।
कोलकाताले अझै दुई खेल खेल्न बाँकी छ । पराजित मुम्बई ८ अंकका साथ तालिकाको नवौँ स्थानमा छ ।
उसले १३ खेल खेल्दा ९ मा हार तथा ४ खेलमा मात्र जीत निकालेको छ । मुम्बईले अब अन्तिम खेलमा शुक्रबार लखनउ सुपर जायन्ट्ससँग खेल्ने तालिका छ ।
