काठमाण्डू, नेपाली कांग्रेसका सभापति शेरबहादुर देउवाले पार्टीका पदाधिकारी र पूर्वपदाधिकारीहरूसँग छलफल गर्न बैठक आह्वान गरेका छन्।
उपसभापति पूर्णबहादुर खड्काले महाधिवेशनको मिति तय गर्न पहल गरेपनि सहमति जुट्न नसकेपछि देउवाले आफैँ बैठक बोलाएका हुन्।
यसअघि सहमति नबन्दा पार्टीका बैठकहरू पटक पटक स्थगित हुँदै आएका थिए।
यो महत्वपूर्ण बैठक आज दिउँसो १ बजे महाराजगन्जस्थित देउवाको निवासमा बस्नेछ।
बैठकमा मुख्य रूपमा आसन्न महाधिवेशनको मिति निर्धारण गर्ने तथा अन्य समसामयिक विषयमा छलफल हुनेछ।
बैठकमा नेता डा. शेखर कोइराला र निवर्तमान गृहमन्त्री रमेश लेखक पनि सहभागी हुने कार्यक्रम छ।
सभापति देउवाको प्रत्यक्ष पहलपछि अब महाधिवेशनको मितिबारे टुङ्गो लाग्ने अपेक्षा गरिएको छ।
पार्टीभित्र देखिएको गतिरोध अन्त्य गरी सबैको सहमतिमा महाधिवेशनको कार्यतालिका तय गर्ने उद्देश्यका साथ यो बैठक आयोजना गरिएको हो।
