काठमाण्डू, नेपाल सरकारले इजरायलमा दीर्घकालीन सहायक श्रमिक (केयरगिभर) र कृषिक्षेत्रमा नेपाली श्रमिक पठाउने विषयमा नयाँ श्रम सम्झौताका लागि स्वीकृति प्रदान गरेको छ।
सोमबार बसेको मन्त्रीपरिषद्को बैठकले इजरायल सरकारसँग तीन क्षेत्रीय कार्यक्षेत्रमा श्रमिक पठाउने गरी श्रम सम्झौता(जिटुजी) गर्ने प्रस्ताव स्वीकृत गरेको हो।
इजरायलसँगको सम्झौताअन्तर्गत अब होम–टु–होम केयरगिभर पनि पठाउन सकिने व्यवस्था भएको छ। यसअघि केयरगिभरहरू केवल संस्थागत काममा मात्र लैजान मिल्ने व्यवस्था थियो।
श्रम, रोजगार तथा सामाजिक सुरक्षा मन्त्रालयका सहसचिव पीताम्बर घिमिरेका अनुसार, नयाँ सम्झौतामा नवीकरणको स्पष्ट प्रावधान राखिएको छ, जसले दीर्घकालीन श्रमिक पठाउने प्रक्रिया अझ सुनिश्चित बनाउनेछ।
यस कदमसँगै धेरै नेपाली युवालाई इजरायलमा रोजगारीको अवसर बढ्ने अपेक्षा छ। साथै, इजरायलमा सेवा सुविधा र पारिश्रमिक राम्रो भएकाले यो देश नेपाली श्रमिकका लागि आकर्षक गन्तव्य मानिन्छ।
यस्तै, नेपाल–ओमानबीच पनि श्रम समझदारी (बीटूबी) को लागि मन्त्रीपरिषद्ले स्वीकृति दिएको छ।
ओमानसँगको सम्झौताले करिब ५० वर्ष पुराना कूटनीतिक सम्बन्धलाई श्रम क्षेत्रमा समेत सुदृढ बनाउनेछ।
नेपालले स्वीकृतिपत्र पठाएपछि ओमानले हस्ताक्षर मिति र स्थान तोक्ने जनाइएको छ।
