काठमाण्डू, विशेष महाधिवेशन गर्ने र नगर्नेभन्नेबीच विवाद भइरहँदा नेपाली कांग्रेसले केन्द्रीय कार्यसम्पादन समितिको बैठक बोलाएको छ।
बिहीबार (आज) दिउँसो ४ बजेका लागि बैठक बोलाइएको कांग्रेसका मुख्य सचिव कृष्णप्रसाद पौडेलले जानकारी दिएका छन्। बैठक किन बोलाइएको भन्ने उनले खुलाएका छैनन्।
बैठक ललितपुरस्थित बीपी स्मृति भवनको केन्द्रीय कार्यालयमा बस्नेछ। बैठकमा केन्द्रीय कार्यसम्पादन समितिका पदाधिकारी एवं सदस्यहरुलाई उपस्थितिका लागि आग्रह गरिएको छ।
कांग्रेसका महामन्त्रीद्वय गगन थापा र विश्वप्रकाश शर्मासहित महाधिवेशनपक्षधरले पुस २७-२८सम्मका लागि विशेष महाधिवेशन आह्वान गरेका छन्।
कांग्रेसको संस्थापनपक्षले भने विशेष महाधिवेशन नहुने र कसैलाई पनि सहभागी नहुन भनेको छ।
महाधिवेशन गर्ने र नगर्नेबीच विवाद चर्किँदा कांग्रेस फुटको संघारमा छ। यद्यपि महामन्त्रीद्वय थापा र शर्माले पार्टी नफुट्ने र पार्टीलाई विधानअनुसार चलाउन विशेष महाधिवेशन गर्नैपर्ने बताउँदै आएका छन्।
