काठमाण्डू, नेपाली कांग्रेसभित्रको आन्तरिक राजनीतिमा संकट गहिरिँदै गएको छ ।
दुवै पक्षबाट वार्ताका लागि टोली गठन गरेपनि संस्थापन टसमस नहुँदा विशेष महाधिवेशन पक्षधर भने नयाँ नेतृत्व चयनका लागि निर्वाचनको तयारीमा जुटेको हो ।
नेपाली कांग्रेसको विशेष महाधिवेशनमा नयाँ नेतृत्व चयनको प्रक्रियामा अघि बढेको छ। विशेष महाधिवेशन निर्वाचन समितिले निर्वाचनको कार्यतालिका सार्वजनिक गरेको हो।
निर्वाचन समितिका संयोजक वरिष्ठ अधिवक्ता सीताराम केसीका अनुसार कांग्रेसको विधानको व्यवस्था अनुसार उम्मेदवारको मनोनयन प्रक्रिया अघि बढ्नेछ।
विशेष महाधिवेशनबाट पारित हुने विधान निर्वाचन आयोगबाट प्रमाणीकरणपछि मात्रै लागू हुने भएकाले पुरानै विधानमा उल्लेख भएका पदका आधारमा निर्वाचनको तयारी गरिएको केसीले बताए।
कांग्रेसको विधानमा सभापति १, उपसभापति २, महामन्त्री २, सहमहामन्त्री ८ सहित केन्द्रीय सदस्यको लागि मतदान हुनेछ।
आज मध्याह्न साढे १२ देखि साढे १ बजेसम्म मतदाता नामावली प्रकाशनको कार्यतालिका छ भने अन्तिम नामावली २ बजे प्रकाशन गरिनेछ।
त्यसपछि दिउँसो २ बजेदेखि ३ बजेसम्म उम्मेदवारी दर्ताको समय तोकिएको छ। आजै साँझ ७ बजेदेखि मतदान शुरु हुने कार्यतालिका छ।
वरिष्ठ अधिवक्ता सीताराम केसीको नेतृत्वमा निर्वाचन समिति गठन गरी निर्वाचनको तयारी गरिएको हो ।
संयोजक केसीद्वारा जारी विज्ञप्तिमा मंगलबार (आज) नै नयाँ कार्यसमिति चयनका लागि निर्वाचन गर्ने तयारी गरिएको हो ।
‘काठमाडौं जिल्ला भृकुटीमण्डपमा सम्पन्न हुने गरी नेपाली कांग्रेस विशेष महाधिवेशन केन्द्रीय महाधिवेशन केन्द्रीय निर्वाचन समितिका संयोजक वरिष्ठ अधिवक्ता श्री सीताराम केसीज्यूको संयोजकत्वमा आज मिति २०८२–०९–२९ गते मंगलबारका दिन नेपाली कांग्रेस केन्द्रीय निर्वाचन समितिको कार्यालय, काठमाडौंमा बैठक बसी निर्वाचन प्रक्रिया अगाडि बढाइएको व्यहोरा सूचित गरिन्छ,’ केसीद्वारा जारी विज्ञप्तिमा भनिएको छ ।
