झापा, आगामी निर्वाचनमा झापाबाट न्यून संख्यामा उम्मेदवारी दिने अवसर पाएका महिला उम्मेदवारहरुले आफ्नो शक्ति प्रदर्शन गर्नुपर्ने चुनौती सामना गर्नुपर्ने देखिएको छ।
कुल ९० जना उम्मेदवारमध्ये जम्मा १४ जना महिला उम्मेदवार रहेका छन्, जुन करिब १५ प्रतिशत हो।
संख्यात्मक हिसाबले कम भए पनि उनीहरुको पृष्ठभूमि र क्षमता पुरुष उम्मेदवारभन्दा कमजोर छैन।
क्षेत्र नं. २ मा तीनजना सशक्त महिला उम्मेदवार आमनेसामने भएका छन्।
राष्ट्रिय स्वतन्त्र पार्टीबाट निवर्तमान उपसभामुख इन्दिरा राना मगर, नेपाली कांग्रेसबाट पूर्वकृषि राज्यमन्त्री सरिता प्रसाई, र पूर्वस्वास्थ्य तथा जनसंख्या राज्यमन्त्री धर्मशीला चापागाई उम्मेदवार बनेका छन्।
उनीहरुसँगै निवर्तमान सभामुख देवराज घिमिरे र राष्ट्रिय प्रजातन्त्र पार्टीका स्वागत नेपाल पनि प्रतिस्पर्धामा छन्।
क्षेत्र नं. १ मा राष्ट्रिय स्वतन्त्र पार्टीकी निशा डाँगीले एमालेका सहकारी विज्ञ रामचन्द्र उप्रेती र कांग्रेसका युवा नेता केशवराज पाण्डेलाई टक्कर दिनुपर्नेछ।
डाँगी यसअघि समानुपातिकतर्फ सांसद बनेकी थिइन् । तर, प्रत्यक्षतर्फ पहिलो पटक उम्मेदवार बनेकी हुन्।
क्षेत्र नं. ५ मा नेपाली कांग्रेसकी मन्धरा चिमरियालाई अझ ठूलो चुनौती छ। यस क्षेत्रमा एमाले अध्यक्ष केपी ओली र राष्ट्रिय स्वतन्त्र पार्टीका वरिष्ठ नेता बालेन शाह उम्मेदवार बनेका छन्।
झापामा सात दलबाट १३ महिला उम्मेदवार र २ स्वतन्त्र उम्मेदवारले मनोनयन दर्ता गराएका छन्।
सबैभन्दा बढी महिला उम्मेदवार क्षेत्र नं. २ मा रहेका छन्, जहाँ पाँच दलबाट पाँच महिलाले उम्मेदवारी दिएका छन्।
अन्य क्षेत्रमा पनि विभिन्न दलका महिला उम्मेदवारले प्रतिस्पर्धा गर्नेछन्। अघिल्लो निर्वाचनमा झापाबाट कुनै पनि महिला उम्मेदवार विजयी हुन सकेका थिएनन्।
२०७४ सालमा झापा क्षेत्र नं. २ मा एमालेकी पवित्रा निरौला खरेल विजयी भएकी थिइन् भने २०६४ सालको संविधानसभा निर्वाचनमा धर्मशीला चापागाईले जितेकी थिइन्।
त्यसबाहेक झापाबाट संसदीय निर्वाचनमा महिलाले जित्न सकेका छैनन्।
