आज मौसम बदलीसँगै देशकाे विभिन्न जिल्लामा वर्षा, चट्याङ र असिनापानी परेकाे छ । पश्चिमी न्यून चापीय प्रणालीका कारण माैसममा आएकाे परिवर्तनसँगै वर्षा, चट्याङ र असिनापानी परेको हाे ।
देशको पूर्वदेखि पश्चिमसम्मैका विभिन्न जिल्लामा वर्षा, चट्याङसँगै असिनापानी परेको हाे भने पश्चिम क्षेत्रमा भन्दा मध्य र पूर्वमा बढी वर्षा भएको जल तथा मौसम विज्ञान विभागले जनाएकाे छ । त्यस्तै काठमाडौँको जरसिंहपौवासहित, नुवाकोटको ककनीलगायत विभिन्न क्षेत्रमा असिना परेको छ ।
पछिल्लो २४ घण्टामा सबैभन्दा बढी वर्षा सङ्खुवासभामा ३६.८ मिलिमिटर परेको छ । त्यसपछि सिन्धुपाल्चोकमा २५.६ मिलिमिटर, ताप्लेजुङमा २४, नुवाकोटमा ११, गोरखामा १३, पर्वतमा २०.६ म्याग्दीमा १०.६,प्यूठानमा १३.८, रोल्पामा २०.८, ललितपुरमा १३.२, काठमाडौँमा २.६, भक्तपुरमा ३.४, दोलखामा ८.४ मिलिमिटर वर्षा भएको बताइएकाे छ ।
धेरै जिल्लामा १० मिलिमिटरभन्दा तल वर्षा भएको छ भने केही ठाउँमा असिनासहितको वर्षा भएको छ । विभागले भोलि पनि विभिन्न ठाउँमा वर्षाको सम्भावना रहेकाे बताएकाे छ । भाेलि बुधबार तराई भू–भागका केही स्थानहरूमा बिहानको समयमा हुस्सु लाग्ने छ भने कोशी, गण्डकी र कर्णाली प्रदेशको पहाडी र हिमाली भू–भाग तथा बाँकी प्रदेशको हिमाली भू–भागमा साधरणतया बादल लाग्ने विभागले जनाएकाे छ ।
त्यसैगरि तराई भू–भागमा मौसम मुख्यतया सफा रहने र कोशी, बागमती र गण्डकी प्रदेशको पहाडी र हिमाली भू–भागका थोरै स्थानहरूमा तथा लुम्बिनी, कर्णाली र सुदूरपश्चिम प्रदेशको पहाडी र हिमाली भू–भागको एक–दुई स्थानमा मेघगर्जन र चट्याङसहित हल्का वर्षा हिमपातको सम्भावना रहेको विभागकाे भनाइ रहेकाे छ ।
