कास्की जिल्लामा आज राति १२ बजेदेखि मदिराजन्य पदार्थको बिक्री, वितरण, ओसारपसार तथा सेवनमा रोक लगाइएको छ। आसन्न फागुन २१ गते हुने प्रतिनिधि सभा सदस्य निर्वाचनलाई स्वच्छ, निष्पक्ष र भयरहित रूपमा सम्पन्न गर्न यस्तो निर्णय गरिएको प्रशासनले जनाएको छ।
जिल्ला प्रशासन कार्यालय कास्कीले जारी गरेको सूचना अनुसार निर्वाचन सुरक्षा निर्देशिका तथा निर्वाचन आयोग र जिल्ला सुरक्षा समितिको निर्णयका आधारमा यो प्रतिबन्ध लागू गरिएको हो।
बन्द गरिएको कारोबार अन्तिम मतपरिणाम घोषणा नहुँदासम्म यथावत् रहने जनाइएको छ। निर्वाचन अवधिमा शान्ति–सुरक्षा कायम राख्न होटल तथा मदिरा व्यवसायी, राजनीतिक दल र सर्वसाधारणसँग प्रशासनले सहयोगको अपिल गरेको छ। सूचनाको उल्लंघन गरेको पाइएमा सुरक्षा निकायबाट निगरानी गरी कानुनी कारबाही गरिने चेतावनी पनि दिइएको छ ।
