झापा र विराटनगर: आगामी चैत २१ गते हुने प्रतिनिधिसभा निर्वाचनका लागि झापा निर्वाचन क्षेत्र नम्बर ५ मा राजनीतिक सरगर्मीले नयाँ उचाइ लिएको छ। राष्ट्रिय स्वतन्त्र पार्टीका वरिष्ठ नेता तथा प्रधानमन्त्रीका दाबेदार बालेन्द्र शाह (बालेन) ले आफ्नो चुनावी बाचापत्र सार्वजनिक गर्दै झापाको मुहार फेर्ने संकल्प गर्नुभएको छ। उहाँको बाचापत्रमा मुख्य गरी सङ्घीय संसद्मा कानुन निर्माणदेखि स्थानीय स्तरमा शिक्षा र स्वास्थ्यमा आमूल परिवर्तन गर्ने एजेन्डाहरू समेटिएका छन्। विशेषगरी काठमाडौँमा सफल सावित भएको ‘शिक्षामा सीप’ कार्यक्रमलाई झापामा पनि लागू गर्ने र सामुदायिक विद्यालयमा स्मार्ट कक्षासहित ‘स्कुल रिटेन्सन प्रोग्राम’ सञ्चालन गर्ने योजनाले स्थानीय मतदाताको ध्यान खिचेको छ। भ्रष्टाचार विरुद्ध संसद्मा कडा रूपमा प्रस्तुत हुने अठोट गर्दै शाहले नागरिकका गुनासा सिधै सदनसम्म पुऱ्याउन झापा-५ मा व्यवस्थित संसद् सचिवालय स्थापना गर्ने प्रतिबद्धता समेत जनाउनुभएको छ।
यसैबीच, झापा र सुनसरीका विभिन्न क्षेत्रमा ‘बालेन लहर’ स्पष्ट रूपमा देखिएको छ। परम्परागत राजनीतिक दलहरूप्रति असन्तुष्ट रहेका मतदाताहरू यसपटक परिवर्तनको पक्षमा खुल्ला रूपमा उभिएका छन्। झापा-५ मा नेकपा एमालेका अध्यक्ष केपी शर्मा ओलीसँगको कडा प्रतिस्पर्धामा उत्रिनुभएका शाहलाई युवा मात्र नभई जेष्ठ नागरिकहरूले समेत साथ दिएका छन्। निर्वाचनको ठ्याक्कै अगाडि आज परेको ४४ औँ राष्ट्रिय मगर दिवसका अवसरमा शुभकामना दिँदै नेता शाहले नेपालको एकीकरणदेखि राजनीतिक रूपान्तरणसम्म मगर समुदायले निर्वाह गरेको भूमिका ऐतिहासिक र अतुलनीय रहेको उल्लेख गर्नुभयो। उहाँले मगर समुदायको वीरता र मौलिक संस्कृतिको संरक्षण गर्नु राज्यको दायित्व भएको समेत बताउनुभएको छ।
निर्वाचन नजिकिँदै गर्दा कोशी प्रदेशमा सुरक्षा व्यवस्थालाई निकै चुस्त पारिएको छ। कोशी प्रदेश प्रहरी कार्यालय विराटनगरका अनुसार निर्वाचनलाई भयरहित र शान्तिपूर्ण बनाउन सुरक्षाका सबै तयारी पूरा भइसकेका छन्। प्रदेशभर १२ हजार नेपाल प्रहरी, २३ हजार निर्वाचन प्रहरी र सशस्त्र प्रहरीसहित ठुलो संख्यामा सुरक्षाकर्मीहरू मैदानमा उतारिएको छ। ३५ लाख ७४ हजारभन्दा बढी मतदाता रहेको कोशी प्रदेशका २८ वटै निर्वाचन क्षेत्रमा संवेदनशील र अति संवेदनशील मतदान केन्द्रहरूको पहिचान गरी विशेष निगरानी बढाइएको छ। सुरक्षा निकायको यो सक्रियता र बालेन शाहको आक्रामक चुनावी अभियानले पूर्वको राजनीतिक नतिजा निकै रोचक हुने संकेत गरेको छ।
