कतारस्थित नेपाली दूतावासले त्यहाँ रहेका नेपाली नागरिकलाई कतारी सरकारद्वारा जारी सुरक्षा निर्देशन पालना गर्न आग्रह गरेको छ। दूतावासले पश्चिम एसियामा हालको बढ्दो तनावलाई दृष्टिगत गर्दै नेपाली नागरिकहरूलाई सतर्क रहन, घरभित्र बस्न, र अज्ञात स्रोतबाट आएका अफवाह वा अप्रमाणित सूचनामा विश्वास नगर्न विशेष अनुरोध गरेको छ।
दूतावासले नेपालीहरूलाई भिडियो क्लिप र अफवाह प्रेषित नगर्न, आधिकारिक घोषणा तथा आपत्कालीन सतर्कता सन्देश निरन्तर हेर्न र दूतावाससँग नियमित सम्पर्क कायम राख्न समेत निर्देशन दिएको छ। यसै क्रममा दूतावासले कतारमा रहेका नेपालीहरूसँग टेलिफोनलगायत विभिन्न माध्यमबाट नियमित सम्पर्कमा रहेको जनाएको छ।
कतारमा हाल ३ लाख ६० हजार नेपाली श्रमिक कार्यरत छन्। दूतावासले उल्लेख गरेको छ कि सबै नेपालीले सुरक्षा निर्देश पालना गरेमा जोखिम न्यून हुने र व्यक्तिगत सुरक्षा सुनिश्चित गर्न सकिनेछ।
यो सुरक्षा चेतावनी संयुक्त राज्य अमेरिका र इजरायलद्वारा इरानमाथि शनिबार गरिएको संयुक्त सैन्य आक्रमण र त्यसको प्रत्याक्रमणमा इरानको कदमसँग सम्बन्धित भएको बताइएको छ। पश्चिम एसियामा यस घटनापछि तनाव बढेको छ, जसले कतारजस्ता देशमा विदेशी नागरिकको सुरक्षा सम्बन्धी सतर्कता आवश्यक भएको दूतावासले औंल्याएको छ।
