तेहरान । इरानका शीर्ष राष्ट्रिय सुरक्षा अधिकारी अली लारिजानी ले अमेरिकासँग कुनै पनि प्रकारको वार्ता नगर्ने स्पष्ट पारेका छन्। उनले सामाजिक सञ्जाल X मार्फत आफ्नो धारणा सार्वजनिक गर्दै इरान अमेरिकासँग संवादको पक्षमा नरहेको बताएका हुन्। हालै केही अन्तर्राष्ट्रिय सञ्चारमाध्यमहरूमा इरानले मध्यस्थकर्तामार्फत अमेरिकासँग पुनः वार्ता अघि बढाउन खोजेको भन्ने समाचार सार्वजनिक भइरहेका बेला लारिजानीले ती दाबीलाई अस्वीकार गरेका छन्। “इरान अमेरिकासँग वार्ता गर्ने पक्षमा छैन,” उनले आफ्नो पोस्टमा उल्लेख गरेका छन्। लारिजानीले अमेरिकी राष्ट्रपति डोनाल्ड ट्रम्प माथि कडा आलोचना गर्दै मध्यपूर्व क्षेत्रको अस्थिरताका लागि उनको नीतिलाई जिम्मेवार ठहर गरेका छन्। उनका अनुसार ट्रम्पले “झूटा आशा देखाएर मध्यपूर्वलाई अराजकतामा धकेलेका” छन् र अहिले अमेरिकी सैनिकहरूको थप क्षतिबारे चिन्तित बनेका छन्। उनले ट्रम्प प्रशासनको ‘अमेरिका फर्स्ट’ नारामाथि प्रश्न उठाउँदै त्यो व्यवहारमा ‘इजरायल फर्स्ट’ मा रूपान्तरण भएको आरोप लगाए। इजरायल को हितका लागि अमेरिकी सैनिकहरूलाई बलि चढाइएको समेत उनको दाबी छ।दिवङ्गत सर्वोच्च नेता आयतुल्ला अली खामेनी का प्रमुख सल्लाहकारसमेत रहिसकेका लारिजानीले हालको तनावपूर्ण अवस्थाबारे प्रतिक्रिया दिँदै इरानले आक्रमण सुरु नगरेको दाबी गरे। “हामीले आक्रमणको सुरुवात गरेका होइनौँ,” उनले स्पष्ट पारे।
