भक्तपुरबाट इन्सास राइफलसहित एक जना पक्राउ, लुटिएको हतियार भएको आशंका

काठमाडौं । भक्तपुरबाट इन्सास राइफलसहित विभिन्न हातहतियार बरामद गर्दै प्रहरीले एक जनालाई पक्राउ गरेको छ। पक्राउ पर्नेमा ३१ वर्षीय आयन सेढाई रहेका छन्। उनीलाई मंगलबार बिहान करिब ९ बजे सूर्यविनायक नगरपालिका–८ भुम्डोल क्षेत्रबाट नियन्त्रणमा लिइएको प्रहरीले जनाएको छ। सेढाई गोरखाको पालुङटार नगरपालिका–९ स्थायी घर भई हाल भक्तपुरमा बस्दै आएका थिए। जिल्ला प्रहरी कार्यालय भक्तपुर का सूचना अधिकारी प्रहरी नायब उपरीक्षक प्रकाश जबेगु का अनुसार सेढाईको साथबाट इन्सास राइफल १ थान, एसएलआर राइफलका गोली ४ राउण्ड, प्लास्टिक राउण्ड १ थान, सटगनमा लाग्ने राउण्ड १ थान, खुकुरी १ थान, खुकुरीको दाप २ थान, बन्चरो १ थान तथा लागूऔषध प्रयोगमा आउने सिरिन्ज ५ थान बरामद गरिएको छ। प्रहरीका अनुसार बरामद गरिएको इन्सास राइफल ‘जेनजी’ आन्दोलनका क्रममा लुटिएको हतियार हुन सक्ने प्रारम्भिक आशंका गरिएको छ। घटनाबारे थप अनुसन्धान भइरहेको र हतियार कसरी र किन ल्याइएको थियो भन्ने विषयमा अनुसन्धान केन्द्रित गरिएको प्रहरीले जनाएको छ।