नेपाल आयल निगमले गएराति १२ बजेपछि लागू हुने गरि पेट्रोलियम पदार्थको मूल्यवृद्धि गरेको छ । निगमले तत्कालका लागि डिजेल, मट्टीतेल र हवाई इन्धनमा आन्तरिकतर्फ मूल्यवृद्धि गरेकाे हाे भने हाललाई पेट्रोलको मूल्य यथावत् राखिएको निगमले जनाएको छ ।
नयाँ मूल्यसूचीअनुसार डिजेल र मट्टीतेलमा प्रतिलिटर ३० रुपैयाँ र हवाई इन्धनमा प्रतिलिटर ५ रुपैयाँ मूल्य वृद्धि गरिएको हाे । परिवर्तित मूल्यअनुसार, डिजेल/मट्टीतेलको प्रतिलिटर २ सय ३७ रुपैयाँ पुगेको छ भने हवाई इन्धनको मूल्य प्रतिलिटर २ सय ५६ रुपैयाँ पुगेको छ ।
अन्तरराष्ट्रिय बजारमा मूल्यवृद्धि भएको र इन्डियन आयल कर्पोरेसनले पठाएको नयाँ मूल्यसूचीअनुसार हिसाब गर्दा पनि निगम अत्यधिक घाटामा रहेको बताइएकाे छ । लागत मूल्य बढी र बिक्री मूल्य कम भएकाले मूल्य समायोजन गर्दासमेत पेट्रोलमा प्रतिलिटर २ रुपैयाँ ३२ पैसा, डिजेलमा प्रतिलिटर ८७ रुपैयाँ ९९ पैसा, मट्टीतेलमा ३६ रुपैयाँ ७० पैसा र खाना पकाउने एलपी ग्यासमा प्रतिसिलिन्डर ३ सय ३१ रुपैयाँ २५ पैसा घाटा कायम रहेको पनि निगमले जनाएको छ ।
निगमले जारी गरेको विज्ञप्ति अनुसार पाक्षिक रूपमा करिब ७ अर्ब ८१ करोड ६१ लाख बराबरको घाटा रहेको उल्लेख गरिएको छ ।
