हरेक वर्ष झैं यसवर्ष पनि आज वैशाख कृष्ण पक्ष औँसीका दिन मातातीर्थ औंसी अर्थात आमाको मुख हेर्ने पर्व आमालाई मीठा–मीठा खानेकुरा खान दिई श्रद्धा भक्तिसाथ मनाइँदैछ ।
शास्त्रीय परम्परा अनुसार शास्त्रमा उपाध्याय (पण्डित), आचार्य र पिताभन्दा पनि ठूली मानिएकी आमाप्रति श्रद्धा, भक्ति, सम्मानका साथ आमाबाट आशीर्वाद लिने गरिन्छ । छोराछोरीले आज बिहानै नुहाइधुवाइ गरेर आफ्नी आमालाई गक्ष अनुसार उपहार दिएर मीठा र तागतिला खानेकुरा खान दिने गरिन्छ ।
आमा नभएकाहरूले आमालाई तर्पण र पिण्ड तथा पुरोहितलाई सिदादानसहित भोजन गराई दिवङ्गत आमा र उनले गरेका महान् एवं कष्टकर काम सम्झने गर्दछन् । त्यसैगरि दिवङ्गत आमाको सम्झनामा चन्द्रागिरि नगरपालिका-६, स्थित मातातीर्थमा तर्पण, श्राद्ध र पूजा गर्ने गर्दछन् ।
आज मातातीर्थमा बिहान ३ बजेदेखि नै स्नान, दान, श्राद्ध, तर्पण र पूजा गर्ने र मेला भर्नेको घुइँचो लागेकाे छ । मातातीर्थ कुण्डमा स्नान गरेमा दिवङ्गत आमालाई शान्ति मिल्ने जनविश्वास समेत रहेकाले बिहानैदेखि स्नान गर्नेकाे भिड लागेकाे हाे ।
