वर्षाका कारण बीपी राजमार्ग अवरुद्ध भएकाे छ । वर्षासँगै रोशी खोलामा आएको बाढीले बीपी राजमार्गको चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, कालढुंगा, माम्ती, आँपघारीलगायतका अस्थायी डाइभर्सन बगाएपछि राजमार्गमा यातायात आवागमन पूर्ण रुपमा अवरुद्ध भएको हाे ।
हिजाे दिउँसो परेकाे वर्षाका कारण राजमार्गको जोखिमलाई मध्यनजर गर्दै सुरक्षा निकायले यातयात आवागमन बन्द गराएको थियो । जिल्ला प्रहरी कार्यालय धुलिखेलले राजमार्गन्गर्तत काभ्रेको नमोबुद्धस्थित कटुञ्जेदेखि रोशीको मङ्गलटार सडकखण्ड दिउँसो साढे ३ बजेदेखि बन्द गराएको थियाे ।
वर्षासँगै रोशी खोलामा ठूलो बाढी आएकाले सम्भावित जोखिम राेक्न आवागमन बन्द गराइएको कार्यालयका सूचना अधिकारी प्रहरी नायव उपरीक्षक रविन विष्टले जनाएका छन् । राजमार्गको अवस्था बुझेर मात्रै यात्रा गर्न सर्वसाधरणलाई आग्रह गर्दै अर्को सूचना जारी नभएसम्म उक्त सडक खण्डमा यात्रा नगर्न अपील गरिएको छ ।
राजमर्गा अबरुद्ध भएपछि अहिले सवारी साधनहरूलाई राजमार्गको प्रवेशमार्ग धुलिखेलको काभ्रेभन्ज्याङ र सिन्धुलीको नेपालथोकमा ‘होल्ड’ गरिएकाे बताइएकाे छ ।
