डोल्पाको त्रिपुरासुन्दरी नगरपालिकाले सार्वजनिक जग्गा हड्पेर बनाइएका संरचना खाली गर्न दुई दिने अल्टिमेटम दिएको छ । नगरपालिकाले आज सूचना जारी गर्दै ४८ घण्टाभित्र त्यस्ता संरचना हटाउन निर्देशनयुक्त चेतावनी दिएको हो ।
भनिएको छ, ‘नगर क्षेत्रभित्र रहेका सम्पूर्ण अतिक्रमित सार्वजनिक सडक तथा स्थानहरुमा राखिएका अस्थायी तथा स्थायी संरचना, टहरा, पसल, निर्माण सामग्रीलगायतका सामानहरु यो सूचना प्रकाशित भएको मितिले ४८ घण्टाभित्र स्वयं हटाई सार्वजनिक स्थान खाली गर्न सम्बन्धित सबैलाई सूचित गरिन्छ ।’
तोकिएको समयसीमाभित्र संरचना नहटाए स्थानीय सरकार सञ्चालन ऐन, २०७४ बमोजिम आफैं हटाउने र त्यसमा लाग्ने सम्पूर्ण खर्च सम्बन्धित व्यक्ति तथा संस्थाबाट असुल्ने नगरपालिकाको चेतावनी छ ।
