सशस्त्र प्रहरी बल नेपालले लाइन व्यारेक छाडी भागेका डेढ दर्जन कर्मचारीलाई सात दिनभित्र हाजिर हुन निर्देशन दिएको छ । प्रधान कार्यालयले आज सूचना निकालेर त्यसरी भागेका १८ जना कर्मचारीलाई सम्पर्कमा आउन निर्देश गरेको हो । उनीहरुलाई लिखित स्पष्टीकरणसहित आगामी सात दिनभित्र हाजिर हुन भनिएको छ ।
अन्यथा, कारबाही गरिने हेडक्वार्टरको चेतावनी छ । सूचनामा भनिएको छ, ‘देहायमा उल्लिखित विवरणका सशस्त्र प्रहरी कर्मचारीहरु विभिन्न इकाइबाट बिदा तथा आफुखुशी लाइन व्यारेक छाडी भागी गैरहाजिर रही कुनै किसिमको सम्पर्कमा समेत नरहेकोले यो सूचना प्रकाशित भएको मितिले बाटोको म्यादबाहेक सात दिनभित्र गैरहाजिर रहनुको मनासिव कारणसहित सम्बन्धित कार्यालयमा सम्पर्क राख्न आउनुहोला । अन्यथा, सशस्त्र प्रहरी नियमावली, २०७२ (संशोधनसहित) बमोजिम कारबाही भइजाने…।’
स्पष्टीकरण सोधिनेमा जवान एलिना अधिकारी, सहायक हवल्दार सिता परियार, प्राविधिक सहायक हवल्दार उमा पराजुली र नरेश घलान, प्राविधिक जवानहरु स्वस्थीका मगर, मनोज भट्ट कपाडी, सन्तोष विक्रम विष्ट, दिपेक धिमाल, प्रनिससिंह ठकुरी, प्रकाशबहादुर विष्ट, किसन साउद, जयबहादुर विष्ट, प्रमेश्वर राय, विक्रम थो कर, यामबहादुर थापा, प्यारजंग शाही, विश्व खत्री र आयूष्मान बम छन् ।
