भारतमा भीषण आँधी झण्डै पाँच दर्जनकाे मृत्यु

गएराति भारतमा आएको भीषण आँधी र वर्षाका कारण झण्डै पाँच दर्जनकाे मृत्यु भएको छ । भारतको उत्तर प्रदेशमा आएको भीषण आँधी र वर्षाका कारण ५६ जनाको मृत्यु भएको छ भने दर्जनौँ घाइते भएका छन् ।

भीषण आँधी र वर्षाका कारण सबैभन्दा बढी क्षति प्रयागराज, भदोही र मिर्जापुर जिल्लामा भएको छ । प्रयागराजमा १६ जनाको मृत्यु भएको छ भने भदोहीमा १५ र मिर्जापुरमा १० जनाको मृत्यु भएको बताइएकाे छ ।

आँधी र वर्षाका कारण भदोहीमा ८ जना गम्भिर घाइते भएका छन् भने तीमध्ये ३ जनाको अवस्था नाजुक रहेकाले उनीहरूलाई थप उपचारका लागि वाराणसीको पठाइएको छ । प्रतिघन्टा तीव्र गतिको हावाहुरीका कारण सयौँ रूखहरू उखालिएका छन् भने बिजुलीका पोलहरू ढलेर कच्ची घरहरू भत्किएका छन् ।

अधिकांशकाे घरको पर्खाल भत्केर वा रूखले किचिएर मृत्यु भएको थियाे । आँधीका कारण मानिसका साथै पशुचौपायाको पनि ठूलो क्षति भएको छ । भदोहीमा मात्रै १६ भन्दा बढी गाईवस्तुको मृत्यु भएको छ ।

उत्तर प्रदेशका मुख्यमन्त्री योगी आदित्यनाथले यस घटनाप्रति गहिरो दुःख व्यक्त गर्दै मृतकका परिवारलाई तत्काल आर्थिक सहायता उपलब्ध गराउन र घाइतेहरूको निःशुल्क उपचार सुनिश्चित गर्न जिल्ला प्रशासनलाई निर्देशन दिएका छन् । अहिले राहत तथा उद्धार कार्य जारी रहेकाे छ ।

आँधीका कारण धेरै ठाउँमा विद्युत् सेवा अवरुद्ध भएको छ भने मृतकको संख्या अझै बढ्न सक्ने आशंका गरिएको छ ।