सरकारले आफ्नै उत्पादनमा आत्मनिर्भर बन्न चिनी उत्पादन वृद्धि गर्ने याेजना ल्याएकाे छ । परनिर्भर हुनुपर्ने विद्यमान अवस्थाकाे अन्त्यका गर्ने लक्ष्य सहित उन्नत जातका उखुमार्फत चिनी उत्पादन वृद्धि गर्ने याेजना ल्याएकाे हाे ।
कृषि, वन तथा पर्यावरण मन्त्रालयमार्फत नेपालमा सञ्चालित चिनी उद्योगको उत्पादन क्षमता अभिवृद्धि गर्न किसानलाई उखु खेतीमा आधुनिक प्रविधिको प्रयोगमा सहजीकरण गर्ने तयारी भइरहेको उद्योग, वाणिज्य तथा आपूर्ति मन्त्रालयले बताएको छ ।
हालै भारत सरकारले चिनी निर्यातमा प्रतिबन्ध लगाएपछि नेपाल सरकारले नेपाली बजारमा हुन सक्ने समस्यालाइ मध्यनजर गर्दै उक्त तयारी थालेको हो । आम उपभोक्ताको हितमा उद्योग, वाणिज्य तथा आपूर्तिमन्त्री गौरी कुमारीले हालै नेपाल चिनी उत्पादक संघका पदाधिकारी, सरोकारवाला मन्त्रालय र निकायका प्रतिनिधिसँग छलफल गर्दै उक्त तयारी थालेकाे मन्त्रालयले जनाएको छ ।
दीर्घकालीन रूपमा चिनीमा आत्मनिर्भर बन्न चिनी उत्पादनको प्रतिस्पर्धात्मक क्षमता वृद्धि गर्ने योजना बनाएसँगै उद्योगीहरूले पनि बजारमा चिनीको सहज तथा सुलभ मूल्यमा नियमित आपूर्ति गर्ने प्रतिबद्धताका साथ बजारमा चिनीको अभाव हुन नदिन उत्पादन प्रवर्धन, आपूर्ति व्यवस्थापन, बजार अनुगमन र नियमनलाई प्रभावकारी बनाउने निर्णय गरेको बताइएकाे छ ।
नेपालमा हाल रहेकाे माैज्दातले आगमी ८ महिनासम्म पुग्ने भएकाले चिनीको अनावश्यक सञ्चिति नगर्न तथा चिनीको उपलब्धता र आपूर्ति सम्बन्धमा कुनै किसिमको अन्योलमा नपर्न मन्त्रालयले आग्रह समेत गरेकाे छ ।
