बागलुङमा जंगली भ्याकुर खाँदा एक जनाको ज्यान गएकाे छ । पश्चिम बागलुङको बडिगाडमा जंगलबाट ल्याएकाे भ्याकुर खाँदा ७२ वर्षिय फिरमकुमारी घिमिरेको ज्यान गएको ।
भ्याकुर खाँदा बडिगाड गाउँपालिका–५ दाग घर भई खार बस्ने ७२ वर्षिय फिरमकुमारी घिमिरेको ज्यान गएको छ भने अरु ८ जना बिरामी भएकाे इलाका प्रहरी कार्यालय बुर्तिवाङका प्रमुख प्रहरी निरीक्षक तिलक मानन्धरले जानकारी दिएका छन् ।
भ्याकुर खाँदा बिरामी हुनेहरुमा बडिगाड गाउँपालिका–५, खारका ५५ वर्षिय दुरपती कामी, ५५ वर्षिय विष्णु घिमिरे, २३ वर्षिया शारदा न्यौपाने, ४३ वर्षिय सुरेन्द्र विक, ६३ वर्षिय भोजराज घिमिरे, ६२ वर्षिया पुतली घिमिरे, ६५ वर्षिय खिमानन्द घिमिरे र १४ वर्षिय अबिसन घिमिरे रहेकाे प्रहरीले जनाएकाे छ ।
अहिले बिरामी सबैको बुर्तिबाङ जिल्ला अस्पतालमा उपचार भइरहेको छ । बिरामीमध्ये दुरपती कामीको अवस्था गम्भीर रहेको छ भने अस्पतालका सूचना अधिकारी पार्वती अर्यालका अनुसार बिरामीहरुमा चक्कर लाग्ने, हातखुट्टा लुलो हुने र वान्ता हुने लक्षण देखिएको छ ।
उनीहरु आइतबार जंगलमा निगुरो टिप्न गएको र खाजामा दिउँसो जंगलबाट ल्याएको भ्याकुर खाएपछि बिरामी परेको बताइएकाे छ ।
