स्वास्थ्य मन्त्री निशा मेहता र नेपालका लागि भ्याक्सिनको सबैभन्दा ठूलो दाता भ्याक्सिन अलायन्स-गाभीका प्रतिनिधिबीच भेटवार्ता भएकाे छ । विश्व स्वास्थ्य संगठन (डब्लुचओ) को जेनेभामा जारी विश्व स्वास्थ्य महासभाको साइडलाइन भेटघाटको समयमा मन्त्री सहितको टोलीले नेपालको सबैभन्दा ठूलो भ्याक्सिन दाता गाभीको प्रतिनिधिसँग भेटवार्त गरेको हो ।
भेटमा नेपालको स्वास्थ्य प्रणाली सुदृढीकरण, स्वास्थ्य वित्तीय व्यवस्थापन तथा जीवनरक्षक स्वास्थ्य सेवामा समान पहुँच सुनिश्चित गर्ने लक्ष्य भएकाले भविष्यमा पनि सहयोग गर्ने प्रतिवद्धता जनाएको बताइएको छ । गाभी सन् २००० देखि नेपालको राष्ट्रिय खोप कार्यक्रमको प्रमुख साझेदार अन्तराष्ट्रिय संस्था हो ।
पछिल्लो पटक गाभीले सन् २०२५ मा नेपालले हासिल गरेको रुबेला निवारण, एचपीभीलगायत विभिन्न जीवनरक्षक खोप कार्यक्रमको विस्तारमा प्राविधिक तथा वित्तीय सहयोग गरेका कारण नेपालमा ती खोप कार्यक्रम सफल भएकाे थियाे ।
आगामी सन् २०२६ नोभेम्बरदेखि नेपाल अतिकम विकसित राष्ट्रबाट विकासशील राष्ट्रमा स्तरोन्नति हुने तयारीमा रहेकाले खोप खरिद तथा स्वास्थ्य क्षेत्रका विभिन्न कार्यक्रमा वित्तीय व्यवस्थापनमा चुनौतीपूर्ण देखिएको र यही सन्दर्भमा गाभीको उच्चस्तरिय टिमसँग नेपालबाट भएको मन्त्रीस्तरिय भेटलाइ महत्त्वपूर्ण मानिएको छ ।
त्यसैगरि स्वास्थ्यमन्त्री मेहताले गाभीसँग भएको भेट अत्यन्त उपलब्धिमूलक भन्दै यसले नेपालको स्वास्थ्य वित्तीय व्यवस्थापनमा साझा लक्ष्य र सहकार्यको लागि झन बलियो समझादारी भएकाे बताइएकाे छ ।
