किसानलाई दुग्ध विकास संस्थान (डीडीसी)ले दैनिक एक करोड भुक्तानी दिन थालेकाे छ । कृषि, वन तथा पर्यावरणमन्त्री गीता चौधरीले संस्थानलाई सुधार कार्ययोजना अगाडि सारेसँगै दैनिक एक करोड किसानलाई भुक्तानी भइरहेको बताएकी छन् ।
पछिल्लो चार महिनाको करिब ५८ करोड बक्यौता दायित्वमध्ये अहिलेसम्म १२ करोड रकम भुक्तानी भइसकेको छ । त्यसैगरि एक महिनाको रकम आगामी असार १३ गतेभित्र भुक्तानी गर्ने तयारी रहेकाे बताइएकाे छ ।
हाल दैनिक डीडीसीकाे एक करोड बराबरको कारोबार भइरहेको छ भने साे रकम दैनिक रुपमा किसानलाई भुक्तानी भइरहेको छ । बाँकी रहेको रकम करिब ४६ करोड दुई महिनामा भुक्तानी हुने बताइएकाे छ ।
दैनिक कारोबार र भुक्तानी प्रक्रिया नियमित रूपमा अघि बढिरहेकाले बाँकी रकम समेत चरणबद्ध रूपमा किसानको खातामा जम्मा हुने मन्त्री चौधरीले बताएकि छन् । दुग्ध किसानको श्रम र योगदानको सम्मान गर्दै किसानको हितलाई प्राथमिकतामा राखेर समस्या समाधानका लागि सम्बन्धित निकायसँग निरन्तर समन्वय भइरहेको समेत मन्त्रालयले जनाएको छ ।
