अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ र महासचिव किरण राईलाई त्रिभुवन अन्तर्राष्ट्रिय विमानस्थलबाटै फर्काइएको छ । फिफा विश्वकप फुटबल हेर्न अमेरिका प्रस्थान गर्ने तयारीमा रहेका अध्यक्ष नेम्वाङ र महासचिव राईलाई विमानस्थलबाट फर्काइएको हाे ।
उनीहरूलाई ‘कालोसूची’ (ब्ल्याक लिस्ट) मा रहेको जनाउँदै हिजाे बिहान विमानस्थलबाटै फर्काइएकाे हाे । त्रिभुवन अन्तर्राष्ट्रिय विमानस्थल अध्यागमन कार्यालयका अनुसार अध्यागमन विभागको रेकर्डमा उनीहरूको नाम कालोसूचीमा रहेकाले विदेश प्रस्थान अनुमति नदिइएको बताइएकाे छ ।
आर्थिक विषयको छानबिनका लागि राष्ट्रिय खेलकुद परिषद् (राखेप) को सिफारिसमा विभागले गत वैशाख महिनामा नै एन्फाका सबै पदाधिकारीहरूलाई विदेश भ्रमणमा रोक लगाउने निर्णय गरेको थियो । सोही निर्णयका आधारमा उनीहरूलाई अमेरिका जानबाट रोकिएको बुझिएको छ ।
आगामी फिफा विश्वकप २०२६ मा सहभागी हुन विदेश जान पाउनुपर्ने माग राख्दै एन्फा अध्यक्ष नेम्वाङ र महासचिव राई आइतबार राखेप पुगेका थिए । उनीहरूले विदेश भ्रमणको प्रतिबन्ध फुकुवा गरिदिन आग्रह गरे तापनि राखेपले उक्त बाटो खुला गर्न स्पष्ट रूपमा अस्वीकार गरेको थियो ।
