फिफा विश्वकप २०२६ अन्तर्गतकाे खेलमा नेदरल्यान्ड्सले स्विडेनलाई ५-१ गाेलकाे फराकिलाे अन्तरले हराएकाे छ । नेदरल्यान्ड्सले स्विडेनमाथि ५-१ को प्रभावशाली जित निकाल्दै फिफा विश्वकपको अन्तिम ३२ मा स्थान बनाउने लगभग सुनिश्चित गरेको हाे ।
नेदरल्यान्ड्सकाे तर्फबाट रोनाल्ड कोम्यानको टोलीका लागि ब्रायन ब्रोबे र कोडी गाक्पोले समान दुई-दुई गोल गरेका थिए भने क्रिसेन्सियो समरभिलले एक गोल थपेर ५ गाेल भएकाे थियाे । स्विडेनका लागि १ गोल एन्थोनी एलाङ्गाले गरेका थिए ।
खेलको पाँचौँ मिनेटमै नेदरल्यान्ड्सले उत्कृष्ट सामूहिक प्रदर्शन गर्दै अग्रता बनाएकाे थियाे । खेलको १७औँ मिनेटमा ब्रोबेले व्यक्तिगत दोस्रो गोल गर्दै टोलीको अग्रता दोब्बर बनाएका थिए ।
दोस्रो हाफ सुरु भएको दुई मिनेट नबित्दै नेदरल्यान्ड्सले तेस्रो गोल थप्यो । खेलको ५४औँ मिनेटमा गाक्पोले व्यक्तिगत दोस्रो गोल पूरा गरे । दोस्रो हाफ सुरुसँगै मैदान प्रवेश गरेका समरभिलले तीव्र गतिमा अगाडि बढ्दै गाक्पोलाई पास उपलब्ध गराए र उनले तल्लो कुनामा उत्कृष्ट प्रहार गर्दै गोल गरेका थिए ।
खेलमा स्विडेनले ५९औँ मिनेटमा एक गोल फर्काएकाे थियाे । वैकल्पिक खेलाडी एलाङ्गाले उत्कृष्ट थ्रु पासमा दौडिँदै गोलरक्षक फेर्ब्रुगेनमाथिबाट बल उचालेर गोल गरेका थिए । यस जितसँगै नेदरल्यान्ड्स ४ अंकसहित समूह ‘एफ’ को शीर्ष स्थानमा पुगेको छ भने स्विडेनले नकआउट चरणमा पुग्न अन्तिम समूह खेलमा जापानविरुद्ध सकारात्मक नतिजा निकाल्नुपर्ने छ ।
