यस वर्ष औसत समयभन्दा ढिलो गरी नेपालमा प्रवेश गरेको मनसुनी प्रणाली देशको पूर्वी तथा मध्य भूभागमा विस्तार भएको छ । गत शुक्रबार कोशी प्रदेशबाट नेपाल भित्रिएको मनसुन आज थप चार प्रदेशमा विस्तार भएको हो ।
अहिले कोशी प्रदेशको सम्पूर्ण भूभागसँगै मधेश, बागमती, गण्डकी प्रदेशका केही भूभाग तथा लुम्बिनी प्रदेशको पूर्वी क्षेत्रसम्म मनसुन फैलिएको छ । तर, देशमा अहिले मनसुन भित्रिए पनि मनसुनी प्रणाली कमजोर रहेकाले देशका बाँकी क्षेत्रमा विस्तार हुन केही दिन लाग्ने जल तथा माैसम महाशाखाले जनाएकाे छ ।
नेपालमा सामान्यतया मनसुन जुन १३ मा प्रवेश गर्ने भए पनि यस वर्ष ढिलो गरी नेपाल भित्रिएकाे हाे । मनसुनको प्रभाव विस्तार भएसँगै पूर्वी तथा मध्य नेपालका विभिन्न स्थानमा वर्षा हुने क्रम सुरु भएको छ । जसअनुसार मौसम बुलेटिन नियमित रूपमा हेर्न र आवश्यक सतर्कता अपनाउन सर्वसाधारणलाई आग्रह गरिएको छ ।
मनसुन अवधिमा नेपालमा सरदरभन्दा कम वर्षा हुने र तापक्रम बढ्ने प्रक्षेपण सहित महाशाखाले यस वर्ष कर्णाली प्रदेशका दक्षिणी भू–भाग, लुम्बिनी प्रदेशका अधिकांश क्षेत्र, मधेश प्रदेशका पूर्वी भू–भाग तथा कोशी प्रदेशका दक्षिणी क्षेत्रमा सरदरभन्दा कम वर्षा हुने बताएकाे छ ।
