नेपालको कोशी, मधेश र बागमती प्रदेशका सम्पूर्ण भूभाग, गण्डकी र लुम्बिनी प्रदेशको अधिकांश भूभागमा मनसुनी वायुको प्रभाव रहेको छ । देशका अन्य बाँकी भूभागमा पश्चिमी वायु र स्थानीय वायुको आंशिक प्रभाव देखिएको जल तथा मौसम पूर्वानुमान महाशाखाले जनाएकाे छ ।
त्यस्तै भोलिसम्ममा गण्डकी र लुम्बिनी प्रदेशका बाँकी क्षेत्रका साथै कर्णाली र सुदूरपश्चिम प्रदेशका सम्पूर्ण भूभागमा मनसुन विस्तार हुने सम्भावना रहेको छ । हाल लुम्बिनी, कर्णाली र सुदूरपश्चिम प्रदेशमा पूर्ण बदली रही कोशी, मधेश, बागमती र गण्डकी प्रदेशमा साधारणतया बादल लागेको छ । त्यस्तै लुम्बिनी, कर्णाली र सुदूरपश्चिमका थोरै स्थान तथा कोशी र बागमती प्रदेशका एक-दुई स्थानमा मेघगर्जन र चट्याङसहित मध्यम वर्षा भइरहेको छ ।
आज दिउँसो देशभर पूर्णतया बादल लाग्ने र हिमाली भूभागका केही स्थानमा मेघगर्जन र चट्याङसहित मध्यम वर्षा र हिमपातको सम्भावना छ । त्यस्तै, पहाडी भूभागका धेरै स्थानमा मेघगर्जन र चट्याङसहित मध्यम वर्षा तथा तराईका केही स्थानमा हल्कादेखि मध्यम वर्षा हुन सक्ने महाशाखाले जनाएकाे छ ।
त्यस्तै कोशी, बागमती र गण्डकी प्रदेशका पहाडी भूभागका एक-दुई स्थानमा भारी वर्षाको समेत सम्भावना रहेको छ। वर्षासँगै कोशी प्रदेशको तराई र मधेश प्रदेशका केही स्थानमा हावाहुरी चल्ने सम्भावना रहेकाले सतर्कता अपनाउन महाशाखाले सबैमा अनुराेध गरेकाे छ ।
आज राति पनि देशभर बादल लाग्ने र कोशी, बागमती, गण्डकी र लुम्बिनी प्रदेशको हिमाली भूभागका केही स्थानमा तथा कर्णाली र सुदूरपश्चिम प्रदेशको हिमाली क्षेत्रका थोरै स्थानमा मेघगर्जन र चट्याङसहित मध्यम वर्षा र हिमपातको सम्भावना रहेको छ ।
त्यसैगरि पहाडी भूभागका केही स्थान र तराईका थोरै स्थानमा मेघगर्जन र चट्याङसहित मध्यम वर्षाको सम्भावना कायमै रहेकाे छ । मधेश, बागमती र गण्डकी प्रदेशका पहाडी भूभागका एक-दुई स्थानमा भारी वर्षाको हुनेछ भने कोशी, बागमती, गण्डकी र लुम्बिनी प्रदेशका तराई र मधेश प्रदेशका केही स्थानमा हावाहुरीको सम्भावना रहेको महाशाखाले जनाएकाे छ ।
