मुलुककाे विभिन्न स्थानमा फैलिएकाे बर्डफ्लुबाट प्रभावित किसानलाई ५० करोड रुपैयाँ क्षतिपूर्ति उपलब्ध गराउन भएकाे छ । पशुसेवा विभागलाई कृषि, वन तथा वातावरण मन्त्रालयले किसानलाई क्षतिपूर्ति उपलब्ध गराउन उक्त रकम निकासा गरेकाे हाे ।
मन्त्रालयले बर्डफ्लु पुष्टि भएका काठमाडौं, ललितपुर, भक्तपुर, काभ्रेपलाञ्चोक, झापा, मोरङ, सुनसरी, महोत्तरी, बारा, चितवन र नवलपरासी गरि ११ जिल्लामा नष्ट गरिएका पन्छी, अण्डा तथा दानाको क्षतिपूर्ति वितरणका लागि उक्त रकम विभागलाई उपलब्ध गराएको हाे । यसअघि बर्डफ्लुबाट आर्थिक नोक्सानी बेहोरेका किसानलाई राहतस्वरुप क्षतिपूर्ति वितरण गर्न विभागले मन्त्रालयसँग रकम माग गरेको थियो ।
विभागका प्रवक्ता डा मुकुल उपाध्यायले निकासा भएको रकम पीडित किसानलाई क्षतिको ७५ प्रतिशतसम्म क्षतिपूर्ति उपलब्ध गराइने जनाएका छन् । विभागका अनुसार बर्डफ्लु संक्रमणका कारण करिब ७ लाख पन्छी, ११ लाख अण्डा र ३ लाख किलो दाना नष्ट गरिएको र त्यसबाट ७० करोड रुपैयाँबराबरको क्षति भएको बताइएकाे छ ।
बर्डफ्लु रोग नियन्त्रण (चौथो संशोधन) २०७४ अनुसार प्रमाणित क्षतिको विवरणका आधारमा नष्ट गरिएका पन्छी, पन्छीजन्य पदार्थ तथा पन्छी उत्पादन सामग्रीको मूल्याङ्कन गरी सम्बन्धित धनीलाई क्षतिको ७५ प्रतिशतसम्म क्षतिपूर्ति उपलब्ध गराउने व्यवस्था छ ।
गत २०८२ चैतदेखि देशको पूर्वी क्षेत्रबाट फैलिन सुरु भएको बर्डफ्लु संक्रमण अहिले ११ जिल्लामा फैलिएको छ ।
