नेपाल प्रहरीका महानिरीक्षक दानबहादुर कार्की र सशस्त्र प्रहरीका महानिरीक्षक नारायणदत्त पौडेल न्युयोर्क प्रस्थान गरेका छन् । संयुक्त राष्ट्र संघको मुख्यालय न्युयोर्कमा आयोजना हुने पाँचौँ ‘युनाइटेड नेसन्स चिफ अफ पुलिस समिट’मा सहभागी हुन महानिरीक्षकहरु त्यसतर्फ प्रस्थान गरेका हुन् ।
असार २३ देखि २४ गतेसम्म हुने समिटमा सहभागि हुन त्यसतर्फ प्रस्थान गरेका प्रहरी महानिरीक्षक कार्की र सशस्त्र प्रहरी महानिरीक्षक पौडेललाई त्रिभुवन अन्तरराष्ट्रिय विमानस्थलमा दुवै संगठनका वरिष्ठ अधिकृतहरुले बिदाइ गरेका थिए ।
केन्द्रीय प्रहरी समाचार कक्षका अनुसार उक्त समिटमा अन्तरराष्ट्रिय सहयोग सुदृढीकरण, प्रविधिको प्रयोगलगायत विषयमा छलफल हुने बताइएको छ । भ्रमणकाक्रममा महानिरीक्षक कार्कीले संयुक्त राष्ट्र संघका उच्च पदाधिकारी तथा संयुक्त अरब इमिरेट्स (युएई) का प्रतिनिधिमण्डलका सदस्यसँग द्विपक्षीय भेटघाट तथा छलफल गर्ने कार्यक्रम रहेकाे छ ।
भ्रमणमा निस्किएका प्रहरी महानिरीक्षक कार्कीको अनुपस्थितिमा प्रहरी अतिरिक्त महानिरीक्षक राजन अधिकारीले नेपाल प्रहरी प्रधान कार्यालयको दैनिक प्रशासनिक कामकाजको जिम्मेवारी सम्हाल्ने छन् ।
