साउन १ देखि १५ गतेसम्म सञ्चालन गरेको करदाता प्रोत्साहन उपहार कार्यक्रम अन्तर्गत विजेताको नाम सार्वजनिक गरिएकाे छ । आन्तरिक राजस्व विभाग, करदाता सेवा शाखा लाजिम्पाटले सञ्चालन गरेको करदाता प्रोत्साहन उपहार कार्यक्रमकाे विजेताको नाम सार्वजनिक गरेको हाे ।
कार्यक्रमअन्तर्गत बम्पर उपभोक्ता पुरस्कारतर्फ हेमराज जोशी विजेता बनेका बन्दै १० लाख रुपैयाँ जितेका छन् । त्यसैगरि विजेता उपभोक्ता पुरस्कारतर्फ १३ जनाकाे नाम छनोट भएकाे छ ।
जसमा अनिषा फौदार खनाल, अमित राई, नरेन्द्रबहादुर विके, हिमाल अर्याल, राजकुमार लामिछाने, अर्जुनकुमार न्यौपाने, सपना न्यौपाने खरेल, सञ्जय श्रेष्ठ, मनोज सिंह, किरण सुनुवार, प्रवीण कँडेल, एकता शर्मा श्रेष्ठ र सहारा गुरुङ रहेका छन् ।
विभागका अनुसार विजेता उपभोक्तामध्ये दुई वटा कुपनका विषयमा थप छानबिन गर्नुपर्ने भएकाले तत्काल समावेश गरिएको छैन् ।
छनोट भएका विजेता उपभोक्ताका सम्बन्धमा करदाता प्रोत्साहन उपहार कार्यक्रम सञ्चालन कार्यविधि, २०८३ को दफा ९ बमोजिमको प्रक्रिया पूरा भएपछि मात्र पुरस्कार वितरण गरिने विभागले जनाएको छ ।
नेपाल सरकारका अर्थमन्त्री डा. स्वर्णिम वाग्लेको उपस्थितिमा अर्थ मन्त्रालयमा यही साउन २२ गते करदाता प्रोत्साहन उपहार कार्यक्रमका पहिलो चरणका विजेता कुपन घोषणा गरिएको थियो ।
