आज नेपाली कांग्रेसका पूर्वसभापति शेरबहादुर देउवा स्वदेश फर्किंदैछन् । झन्डै ६ महिना लामाे विदेश बसाइपछि उनी स्वदेश फर्किन लागेका हुन् ।
पूर्वसभापति देउवा स्वदेश फर्किने तयारी भएसँगै कांग्रेसको संस्थापनइतर समूहले उनलाई बाजागाजा र सांस्कृतिक झाँकीसहित स्वागत गर्ने तयारी गरेको छ । त्रिभुवन अन्तर्राष्ट्रिय विमानस्थलमा बाजागाजा र सांस्कृतिक झाँकीसहित स्वागत गर्न लागिएको हो ।
थाई एयरबाट स्वदेश फर्किन लागेका पूर्वप्रधानमन्त्री देउवा आज मध्याह्न साढे १२ बजे काठमाडौं अवतरण हुने छन् । जेनजी आन्दोलनका क्रममा भएको सांघातिक आक्रमणमा परी घाइते भएका पूर्वसभापति देउवा गत फागुन १३ गते राति सिंगापुर एयरलाइन्सको उडानबाट सिंगापुर गएका थिए भने ७ चैतमा सिंगापुरबाट थप उपचारका लागि भन्दै हङकङ पुगेका थिए ।
स्वदेश फर्किएपछि देउवा शुक्रबार सुकेधारास्थित मिराकल पार्टी प्यालेसमा आयोजना हुने इतर समूहको राष्ट्रिय भेलामा सहभागी हुने छन् । इतर समूहको प्रचार–प्रसार समिति संयोजक मीन विश्वकर्माले भेलाको उद्घाटन समारोह शुक्रबार दिउँसो १ बजे सुरु हुने पनि बताएका छन् ।
तीन दिनसम्मे चल्ने भनिएको राष्ट्रिय भेलामा पाँच हजार नेता–कार्यकर्ताहरूको उपस्थिति हुने अनुमान इतर समूहले गरेको छ ।
