पछिल्लाे समय ग्यासको हाहाकार भएपछि ग्यास लिन लाइन बस्ने उपभोक्ताले नागरिकता वा राष्ट्रिय परिचयपत्र ल्याउन पर्ने भएको छ । नेपाल आयल निगमले काठमाडौं उपत्यकाका विभिन्न स्थानबाट ग्यास बिक्री वितरणको व्यवस्था गर्दै उपभोक्ताले ग्यास खरिद गर्दा नागरिकता प्रमाणपत्र वा राष्ट्रिय परिचयपत्र अनिवार्य रूपमा साथमा ल्याउनुपर्ने जनाएको हाे ।
निगमले आज बिहान ११ बजेदेखि साँझ ५ बजेसम्म उपत्यकाका सात स्थानबाट विभिन्न कम्पनीका ग्यास सिलिण्डर बिक्री गर्न लागेको छ । जसअन्तर्गत टेकूस्थित निगमको परिसर, पशु सेवा शाखा चपली बूढानीलकण्ठ, राधास्वामी कीर्तिपुर परिसर, नयाँ बजारस्थित जुडो हल परिसर, तारकेश्वर नगरपालिका परिसर, चन्द्रागिरि नगरपालिका कार्यालय परिसर र भक्तपुरको ठिमीस्थित राष्ट्रिय क्षयरोग केन्द्र परिसरमा ग्यास सिलिण्डर बिक्री गर्न लागेको हाे ।
निगमले हिजो शनिबार पनि काठमाडौंका विभिन्न स्थानमा ग्यास वितरण गरेको थियो भने लाइन बसेका कतिपय उपभोक्ताले ग्यास सिलिण्डर नपाई रित्तै घर फर्किएका थिए ।
