आजदेखि एनपीएल (नेपाल प्रिमियर लिग) को तेस्रो संस्करण काठमाडौंमा सुरु हुँदैछ । काठमाडौंस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा हुने उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्सले प्रतिस्पर्धा गर्दैछन् ।
दुई टोलीबीचको खेल आज दिउँसाे साढे ४ बजे सुरु हुनेछ भने प्रतियोगितामा लुम्बिनी र सुदूरपश्चिमसहित काठमाडौं गोर्खाज, जनकपुर बोल्ट्स, चितवन राइनोज, विराटनगर किङ्स, पोखरा एभेन्जर्स र कर्णाली याक्स गरी आठ टोली सहभागी हुने छन् ।
तेस्रो संस्करणकाे प्रतियोगिता सिंगल राउन्ड रोबिन प्रणालीमा सञ्चालन हुनेछ भने त्यसपछि इलिमिनेटर र क्वालिफायर चरणका खेल हुनेछन् । तेस्रो संस्करण प्रतियोगिताको फाइनल खेल मंसिर ५ गते हुनेछ ।
यस संस्करणको विजेताले १ करोड ५० लाख रुपैयाँ पुरस्कार प्राप्त गर्नेछन् भने उपविजेताले ८० लाख, तेस्रो हुने टोलीले ४० लाख र चौथो हुने टोलीले ३० लाख रुपैयाँ पाउने नेपाल क्रिकेट संघ (क्यान) का कोषाध्यक्ष पदमबहादुर खड्काले जानकारी दिएका छन् ।
अघिल्लो संस्करणको तुलनामा यस वर्ष पुरस्कार राशि बढाइएको हो । गत संस्करणमा लुम्बिनीले सुदूरपश्चिमलाई ६ विकेटले पराजित गर्दै उपाधि जितेको थियो । त्यतिबेला विजेताले १ करोड १० लाख रुपैयाँ प्राप्त गरेको थियो ।
अन्तर्राष्ट्रिय खेलाडीको समेत सहभागिता रहेकाे यस खेलमा पुरस्कार राशि र डीआरएस प्रविधिको प्रयोगले तेश्राे संस्करणको एनपीएललाई थप प्रतिस्पर्धात्मक बनाउने अपेक्षा गरिएको छ ।
