काठमाण्डू, अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको साढे २० वर्षपछि पूर्वमन्त्री गोविन्दराज जोशी सर्वोच्च अदालतबाट भ्रष्टाचार मुद्दामा दोषी ठहर भएका छन् ।
आइतबार न्यायाधीशहरू विनोद शर्मा र बालकृष्ण ढकालको इजलासले जोशीलाई दोषी ठहर गर्दै ९ महिना कैद र ६९ लाख १५ हजार जरिवाना फैसला सुनाएको हो ।
भ्रष्टाचार निवारण ऐन २०५९ अनुसार, सार्वजनिक पुगेका व्यक्तिले आफ्नो वैधानिक आम्दानीको तुलनामा अस्वाभाविक रुपमा सम्पत्ति आर्जन गर्नु भ्रष्टाचार हो ।
त्यही प्रक्रियाअनुसार जोशीमाथि दुई दशकअघि अख्तियारले भ्रष्टाचार मुद्दा चलाएको हो ।
अख्तियार दुरुपयोग अनुसन्धान आयोगले १८ पुस, २०६० सालमा पूर्वमन्त्री जोशी विरुद्ध गैरकानूनी सम्पत्ति आर्जन गरेको आरोपमा भ्रष्टाचार मुद्दा दायर गरेको थियो ।
अख्तियारले त्यतिबेला उनीमाथि ३ करोड ९३ लाख ६२ हजार ५७६ रुपैंया भ्रष्टाचार गरेको आरोप लगाएको थियो ।
पूर्वमन्त्री जोशीको गैरकानूनी सम्पत्ति लुकाएको आरोपमा अख्तियारले पत्नी सविता पन्त, उनकी दिदी चोलाकुमारी पन्त, सासु नीरकुमारी, साला बासुदेव पन्त र बासुदेवका कान्छा ससुरा ताराराज पाण्डेलाई समेत मुद्दा चलाएको थियो ।
यसअघि उनलाई विशेष अदालतले डेढ वर्ष कैद सजाय सुनाएको थियो । सर्वोच्च अदालतले कैद सजाय आधा घटाएर ९ महिना मात्रै कायम गरिदिएको छ ।
अब उनले तत्काल कैद सजाय भोग्नुपर्नेछ । उनको जरिवाना पनि झण्डै दुईतिहाइले घटेको छ ।
यसअघि विशेषले २ करोड १६ लाख १४ हजार ३७६ रुपैयाँ जरिवाना सुनाएकामा सर्वोच्च अदालतले विशेष अदालतको फैसला उल्ट्याउदै ६९ लाख १५ हजार रुपैंया मात्रै जरिवाना गर्ने फैसला गरेको छ ।
२०५९ सालमा प्रतिनिधिसभामा भ्रष्टाचार नियन्त्रण ऐनको संशोधन विधेयक पेस गर्दा जोशी स्वयं गृहमन्त्री थिए ।
सो विधेयकमा सार्वजनिक पदमा रहेकाहरुले अस्वभाविक जीवनस्तर अपनाएको देखिएमा अख्तियारले छानबिन गर्नसक्ने र सम्पत्तिको स्रोत खुलाउन नसकेमा भ्रष्टाचार मुद्दा दायर हुने उल्लेख थियो ।
आफैँले पेस गरेको विधेयक पारित भएपछि जोशी स्वयं त्यसको सिकार बने । २०४८ सालपछिको एक दशकसम्म सातपटक मन्त्री बनेका थिए ।
उनले त्यसबीचमा जलस्रोत, शिक्षा, गृहलगायत विभिन्न महत्त्वपूर्ण मन्त्रालय सम्हालेका थिए ।
२०५० सालसम्म सामान्य आर्थिक हैसियत भएका जोशीको मन्त्री भएपछिको जीवनस्तर अस्वाभाविक देखिएको दाबी गर्दै अख्तियारले २०६० सालमा उनीविरुद्ध विशेष अदालतमा मुद्दा दायर गरेको थियो ।
