एजेन्सी, श्रीलंकासँगको एकदिवसीय सिरिजको दोस्रो खेलमा भारत ३२ रनले पराजित भएको छ ।
गएराति सम्पन्न खेलमा श्रीलंकाले दिएको २ सय ४१ रनको मध्यम लक्ष्य पछ्याउनेक्रममा भारत ४२.२ ओभरमा २ सय ८ रनमै अलआउट भयो ।
उसका लागि कप्तान रोहित शर्माले ४४ बलमा पाँच चौका र चार छक्कासहित सर्वाधिक ६४ रन बनाए ।
यस्तै, अक्षर पटेलले ४४, शुभमन गिलले ३५, वासिङ्टन सुन्दरले १५ र विराट कोहलीले १४ रन जोडे । बाँकी ब्याटरले भने दोहोरो अंकमा समेत रन जोड्न सकेनन् ।
भारतको पारी ध्वस्त पार्नेक्रममा श्रीलंकन स्पिनर जेफ्री वान्डरसेले घातक बलिङ गरे । उनले १० ओभरमा ३३ रन दिएर ६ विकेट लिए ।
यस्तै, कप्तान चरिथ अशलंकाले ६।२ ओभरमा दुई मेडनसहित २० रन दिएर तीन विकेट हात पारे ।
त्यसअघि कोलम्बोस्थित आर प्रेमदास स्टेडियममा टस जितेर ब्याटिङ रोजेको श्रीलंकाले निर्धारित ५० ओभरमा ९ विकेट गुमाएर २ सय ४० रन बनायो ।
उसका लागि अविष्का फर्नान्डो र कामिन्दू मेन्डिसले ४०र४०, दुनिथ वेललागेले ३९, कुशल मेन्डिसले ३०, कप्तान चरिथ अशलंकाले २५, अकिला धनञ्जयले १५, सदीरा समरविक्रमाले १४ र जनिथ लियानागेले १२ रन बनाए ।
भारतका लागि वासिङ्टन सुन्दरले तीन, कुलदीप यादवले दुई, अक्षर पटेल र मोहम्मद सिराजले एकरएक विकेट लिए ।
यो जितपछि घरेलु टिम श्रीलंकाले सिरिजमा १–० को अग्रता लिएको छ । यी दुई टिमबीचको पहिलो खेल बराबरीमा टुंगिएको थियो ।
श्रीलंका र भारतबीचको अन्तिम तथा तेस्रो खेल बुधबार हुनेछ ।
