एजेन्सी, बंगलादेशमा १७ सदस्यीय मन्त्रिपरिषद् गठन भएको छ । नोबेल पुरस्कार विजेता मुहम्मद युनुसको नेतृत्वको अन्तरिम सरकारमा विद्यार्थी आन्दोलनका दुई नेता नासिद इस्लाम र आसिफ महमूद पनि मन्त्री बनेका छन् ।
विहीवार राति अन्तरिम सरकारको प्रमुख सल्लाहकारको शपथ लिएलगत्तै युनुसले १७ सदस्यीय मन्त्रिपरिषद् गठन गरेका हुन् । मन्त्रिपरिषद्मा पूर्व ब्रिगेडियर जनरल एम सखावत हुसेन पनि छन् ।
सरकारी रोजगारीमा रहेको कोटाविरुद्ध विद्यार्थीहरुले थालेको आन्दोलन चर्किएपछि तात्कालीन प्रधानमन्त्री शेख हसिनाले २१ गते राजीनामा दिएर देश छोडकी थिइन् ।
लगत्तै सेना प्रमुखले पत्रकार सम्मेलन गरेर अन्तरिम सरकार बनाउने बताएका थिए ।
विद्यार्थी नेताहरुले सेनाको नेतृत्वमा सरकार स्वीकार नगर्ने बताउँदै युनुसको नाम अगाडि सारेका थिए ।
विद्यार्थी नेताहरुको प्रस्ताव अनुसार अन्तरिम सरकारको नेतृत्व गर्न सहमत भएका युनुस बिहीबार मात्र ढाका पुगेका थिए ।
राष्ट्रपति मोहम्मद साहाबुद्दिनले विद्यार्थीहरुको मागअनुसार संसद भंग गरेर युनुसको नेतृत्वमा अन्तरिम सरकार बनाएका हुन् ।
