एजेन्सी, आइसीसी क्रिकेट विश्वकप लिग–२ मा अमेरिकाले विजयी सुरुवात गरेको छ ।
प्रतियोगितामा सुखद सुरुवात गर्नेक्रममा अमेरिकाले गएराति सम्पन्न आफ्नो पहिलो खेलमा क्यानडाविरुद्ध १४ रनको रोमाञ्चक जीत निकाल्यो ।
क्यानडाले भने जारी श्रृंखलामा लगातार दोस्रो हार बेहोर्यो । आफ्नो छैटौँ खेलमा अमेरिकाले दिएको ३ सय ५ रनको लक्ष्य पछ्याएको क्यानडाले निर्धारित ५० ओभरमा ९ विकेट गुमाएर २ सय ९० रन मात्र बनाउन सक्यो ।
उसका लागि हर्ष ठाकरले ७७, डिलन हेलिगरले ५६, आरोन जोनसनले ५५, प्रगत सिंहले ४२ र कप्तान निकोलस किर्तनले १४ रन बनाए ।
अमेरिकाका लागि नोस्टुश केन्जिगेले तीन तथा शेडले भ्यान शाल्कविक र जसदीप सिंहले दुईरदुई विकेट लिए ।
त्यसअघि नेदरल्याण्ड्सको हेगस्थित स्पोर्टपार्कमा टस हारेर ब्याटिङको मौका पाएको अमेरिकाले निर्धारित ५० ओभरमा ४ विकेट गुमाएर ३ सय ४ रन बनायो ।
उसका लागि कप्तान मोनांक पटेलले शतकीय इनिङ खेले । ९५ बलको सामना गरेका उनले सात चौका र पाँच छक्कासहित अविजित १२१ रनको इनिङ खेलेका हुन् ।
एकदिवसीयमा मोनांकको यो दोस्रो शतक हो । यस्तै, स्मित पटेलले ६३, शायन जहाँगीरले अविजित ५७, स्टिभन टेलरले २७ र आरोन जोन्सले १५ रन बनाए ।
क्यानडाका लागि डिलन हेलिगर, हर्ष ठाकर, सादबिन जाफर र प्रगत सिंहले एकरएक विकेट लिए ।
यो जीतपछि अमेरिका छैटौँ स्थानमा उक्लिएको छ । अमेरिकाको जीतले नेपाल सातौं स्थानमा झरेको छ । नेपालले अहिलेसम्म चार खेलबाट दुई अंक मात्र जोडेको छ ।
लिग–२ अन्तर्गत नेपालले दोस्रो सिरिज आउँदो सेप्टेम्बरमा खेल्ने तालिका छ । अमेरिकासँगको हारका बाबजुद क्यानडा दोस्रो स्थानमा कायमै छ ।
उसले अहिलेसम्म ६ खेलबाट ८ अंक जोडेको छ ।
