काठमाण्डू, प्रधानमन्त्री केपी ओलीले सामाजिक थिति र प्रबन्ध भत्काएर समाज अघि बढ्न नसक्ने बताएका छन् ।
नेपाल खेलकुद महासङ्घको तेस्रो केन्द्रीय कमिटी बैठकलाई आइतबार सम्बोधन गर्दै प्रधानमन्त्री ओलीले सामाजिक प्रबन्धलाई मानेर नै समाज अघि बढ्ने बताएका हुन् ।
‘‘सामाजिक प्रबन्ध मानेर नै समाज चल्ने हो, संविधान, कानून मानेर नै समाज चल्छ’’, उनले भने ।
नेपालमा स्थापना गरिएको प्रणाली उपयुक्त छ कि छैन भन्ने विषयमा अहिले छलफल गर्ने बेला नभएको प्रधानमन्त्री ओलीले बताए ।
संवैधानिक व्यवस्थालाई प्रभाकारी रूपमा कार्यान्वयन गर्न र सफल बनाउने तर्फ ध्यान जानु पर्नेमा प्रधानमन्त्रीओलीको जोड थियो ।
उनले स्वतन्त्रता भनेको छाडापन नभएको प्रष्ट पारे । ‘‘स्वतन्त्रताको हक भनेको बेलगमा र छाडा हुनु होइन, लोकतन्त्र भनेको छाडातन्त्र होइन’’, प्रधानमन्त्री ओलीले भने ।
लोकतन्त्र भनेको जनताको शासन भएको भन्दै प्रधानमन्त्री ओलीले यो छाडा हुन नसक्ने बताए । कसैको सनकका भरमा शासन सञ्चालन नहुने उनले प्रष्ट पारे । ‘लोकतन्त्र एउटा अनुशासित समाज हो’’, उनले भने ।
कुनै योगदान नभएकालाई सामाजिक सञ्जालबाट कराएर महान् बनाउन खोज्ने र जसले योगदान गरेका छन् तिनीहरूलाई बदनाम र अपमान गरेर सिद्ध्याउन खोज्ने प्रयास भएका भन्दै ओलीले त्यो कुरा बुझ्न जरुरी रहेको प्रधानमन्त्री ओलीको भनाइ थियो ।
उनले लोकतान्त्रिक, सभ्य र गतिशील समाज निर्माणको दिशामा अघि बढ्न ओलीले सबैलाई आह्वान गरे ।
अहिलेको सरकार भ्रष्टाचार नियन्त्रणका लागि बनेको बताउँदै प्रधानमन्त्री ओलीले भ्रष्टाचार नियन्त्रणमा हल्ला गर्ने र भ्रष्टाचार लुकाउनको लागि नभएर त्यसको नियन्त्रणको लागि काम गर्न बनेको बताए ।
कसैलाई आग्रह वा पूर्वाग्रह राखेर फसाउने काम सरकारबाट नहुने बताउँदै प्रधानमन्त्री ओलीले भ्रष्टाचारविरुद्ध कानून अनुसार शून्य सहनशीलता अपनाइने प्रष्ट पारे ।
प्रधानमन्त्री ओलीले भने , ‘‘हामी कसैको विरुद्ध छैनौँ, तर कसैले पनि कसैका विरुद्ध बेठिक गर्न पाइँदैन् ।’’
प्रधानमन्त्री ओलीले सरकाले खेल क्षेत्रको महत्त्व बुझेको बताउँदै आफ्नो गच्छे अनुसार खेल क्षेत्रको विकासका लागि काम गर्ने बताए ।
त्यसैले क्रिकेट रङ्गशालाका काम ३ सय दिन भित्रै सक्ने घोषणा गरेर सरकारले काम गरिरहेको प्रधानमन्त्री ओलीले जानकारी दिए ।
