काठमाण्डू, राष्ट्रिय स्वतन्त्र पार्टी (रास्वपा) ले स्थानीय तहको उपनिर्वाचनमा भाग लिने निर्णय गरेको छ ।
बुधबार बसेको पार्टीको केन्द्रीय समिति बैठकले यस्तो निर्णय गरेको कार्यवाहक प्रवक्ता मनीष झाले जानकारी दिए ।
“पार्टीले स्थानीय तह उपनिर्वाचनमा भाग लिने निर्णय गरेको छ,” कार्यवाहक प्रवक्ता झाले भने ।
यसअघि २०७९ वैशाखमा भएको स्थानीय निर्वाचनका बेला रास्वपा गठन भइसकेको थिएन, त्यसैले भाग लिन पाएन । तर, उपनिर्वाचनमा भने भाग लिने निर्णय पार्टीले गरेको हो ।
बालेन शाह, हर्क साम्पाङ, गोपाल हमाललगायतको जीतबाट हौसिएका रवि लामिछानेले पहिले संसदीय निर्वाचनमा स्वतन्त्र उम्मेदवारी दिने घोषणा गरेका थिए ।
तर, पछि स्वतन्त्र नामकै पार्टी घोषण गरेर पार्टीकै रूपमा निर्वाचनमा होमिए ।
पार्टी बनिसके पनि प्रदेश निर्वाचनमा भाग नलिएको रास्वपा प्रतिनिधि सभामा भने २१ सिट जित्दै चौथो दल बन्यो ।
रास्वपाभित्र प्रदेश संरचनाबारे भने बहस हुने गरेको छ । नेताहरूले प्रदेश संरचनालाई ‘भद्दा’ संरचना भन्ने गरेका छन् ।
निर्वाचन आयोगले स्थानीय उपनिर्वाचन मंसिरको तेस्रो साता प्रस्ताव गरेको छ । सरकारले भने निर्णय लिइसकेको छैन् ।
