काठमाण्डू, नेकपा एमालेले अन्ततः डा भीमबहादुर रावललाई पार्टीबाट निष्काशित गरेको छ । एमाले सचिवालय बैठकले पूर्व उपाध्यक्ष रावललाईलाई सङ्गठित सदस्यबाट हटाएको हो ।
एमालेले पूर्व उपाध्यक्ष रावललाई कात्तिक ६ गते एमालेलाई व्यवसायी तथा समाजसेवी मीनबहादुर गुरुङले पार्टीका लागि जग्गा दान गरेको विषय र विभिन्न समयमा पार्टीविरुद्ध बोलेको भन्दै स्पष्टीकरण सोधेको थियो ।
एमालेको महाधिवेशनमा केपी शर्मा ओलीविरुद्ध अध्यक्षमा उम्मेदवारी दिएर चुनाव लडेदेखि नै रावल ओलीका अगाडि आँखी बन्दै आइरहेका थिए ।
“अभिव्यक्ति पार्टीलाई बलियो बनाउनेभन्दा निरन्तर कमजोर बनाउने हिसाबले आएकाले उहाँलाई सङ्गठित सदस्यबाट मुक्त गर्ने निर्णय गरिएको छ,” उपमहासचिव प्रदीप ज्ञवालीले भने ।
उनलाई प्रतिनिधि सभाको निर्वाचनमा उम्मेदवारसमेत नबनाएर सुदूरपश्चिम एमालेका खम्बा रावलमाथि एमालेले ठूलै अपमान गर्दै आएको थियो ।
साथै एमालेले पार्टी स्थायी कमिटी सदस्य विन्दा पाण्डे र केन्द्रीय सदस्य उषाकिरण तिम्सिनालाई ६ महिना निलम्बन गरेको छ ।
