काठमाण्डू, संसदमा प्रतिनिधित्व गर्ने विपक्षी दलहरूको बैठकले संसदको हिउँदे अधिवेशनमा सरकारले ल्याएको अध्यादेशको अस्वीकार गर्ने अडान कायम नै राखेको छ ।
बिहीबार सिंहदरबारमा बसेको बैठकमा अध्यादेश प्रक्रिया हिसाबले पनि गलत भएको कारण सबै विपक्ष दलहरूले यसको अस्वीकार गर्ने सर्वसम्मत निर्णय गरेको माओवादी केन्द्रका प्रमुख सचेतक हितराज पाण्डेले जानकारी दिए ।
‘भोलिदेखि सुरु हुने संघीय संसदका अधिवेशन व्यवस्थितरूपमा जनताका सरोकारहरूलाई उठाउने कुरामा एकमत भएको छ ।
खास गरेर अध्यादेशबारे सरकारले जसरी सदनमा ल्याएर सबै कानुन व्यवस्थित बनाएर अगाडि बढाउनुको सट्टा सरकारले सदन बोलाउने बेलामा नै आएर जसरी अध्यादेश ल्याएको छ ।
त्यो प्रकृयाको हिसाबले पनि गलत छ । त्यसैले सबै विपक्ष दलहरूले यसको अस्वीकार चाहिँ गर्नुपर्छ भन्ने सर्वसम्मत निर्णय भएको छ,’ पाण्डेले भने ।
बैठकमा नेकपा माओवादी केन्द्रका अध्यक्ष पुष्पकमल दाहाल, नेकपा एसका अध्यक्ष माधवकुमार नेपाल, राष्ट्रिय स्वतन्त्र पार्टीका कार्यवाहक सभापति डिपी अर्याल, राष्ट्रिय जनमोर्चाका अध्यक्ष चित्रबहादुर केसी सहभागी थिए ।
यस्तै, वेदुराम भुसाल, महेन्द्रराय यादव, नारायणकाजी श्रेष्ठ, देव गुरुङ, स्वर्णिम वाग्ले र सन्तोष परियारलगायत नेताहरूको पनि बैठकमा सहभागिता थियो ।
