हिजो तोलामा १९ सय बढेको सुनको मूल्यमा आज पनि उच्च वृद्धि, चाँदी पनि महँगियो

काठमाण्डू, हिजो (मंगलबार) तोलामा एक हजार नौसय रुपैयाँ बढेको सुनको मूल्यमा आज पनि उच्च वृद्धि भएको छ। सुन आज प्रतितोला दुई हजार दुईसय रुपैयाँ बढेको हो।

यो साताको तीन दिनसम्म स्थिर रहेको सुनको मूल्य हिजो र आज उल्लेख्य मात्रामा बढेको छ।

आज सुनको मूल्य प्रतितोला एक लाख ६६ हजार नौसय रुपैयाँ पुगेको नेपाल सुनचाँदी व्यवसायी महासंघले जनाएको छ। हिजो सुनको मूल्य एक लाख ६४ हजार सातसय रुपैयाँ थियो।

चाँदीको मूल्य पनि आज प्रतितोला ४५ रुपैयाँ बढेको छ। आज चाँदी प्रतितोला एक हजार नौसय ७५ रुपैयाँमा कारोबार भइरहेको छ। हिजो चाँदीको मूल्य प्रतितोला एकहजार नौसय ३० रुपैयाँ थियो।

गएको मंसिर तेस्रो साता सुनको मूल्य दुई दिनमै तोलामा साढे १८ हजार रुपैयाँ घटेको थियो।

गत कात्तिक १५ गते सुनको मूल्यले हालसम्मकै महँगो कीर्तिमान बनाएको थियो। त्यो दिन सुन प्रतितोला १ लाख ७१ हजार रुपैयाँ पुगेको थियो।

सरकारले भन्सारदर घटाएपछि सुनचाँदीकै मूल्यमा गिरावट आएको हो।