काठमाण्डू, युक्रेनी सेनाको कब्जामा रहेका दुई नेपाली युवा शुक्रबार काठमाडौँ आइपुग्ने भएका छन्। दलालको प्रलोभनमा परेर युक्रेन पुगेका दुई नेपालीलाई उद्धार गरी काठमाडौँ फर्काउन लागिएको हो।
तेह्रथुमका २९ वर्षीय फुर्वा शेर्पा र दोलखाका ३९ वर्षीय शेर साम्बो शेर्पालाई काठमाडौँ फर्काउन लागिएको हो। उनीहरू ९ महिना युक्रेनी सेनाको कब्जामा परेका थिए।
युक्रेनी सेनाले बुधबार माल्दोभामा छाडेका उनीहरूलाई गैरआवासीय नेपाली संघको सहयोगमा काठमाडौँ फर्काउन लागिएको हो।
संघका अध्यक्ष डा बद्रि केसीका अनुसार उनीहरूलाई टर्किस एयरलाइन्सको जहाजमार्फत माल्दोभाबाट नेपाल फर्काउने व्यवस्था गरिएको छ।
उनीहरू शुक्रबार दिउँसो काठमाडौँ आइपुग्नेछन्। भारतको नयाँदिल्लीस्थित एक एजुकेसन कन्सल्टेन्सीमार्फत तीन महिनाको विद्यार्थी भिसामा उनीहरू युक्रेन पुगेका थिए।
मे महिनादेखि युक्रेनको मिकोलाइटस्थित एमसीसी डिटेन्सन केन्द्रमा थुनिन पुगे।
उद्धारमा जर्मनीका लागि नेपाली राजदूत डा. शैल रुपाखेती र नियोग उपप्रमुख सागर फुयाँलले महत्त्वपूर्ण भूमिका निर्वाह गरेको अध्यक्ष डाक्टर केसीले बताए।
